மேற்குவங்க சட்டமன்றத் தேர்தலின் முதற்கட்ட வாக்குப்பதிவு இன்று நடைபெற்று வருகிறது. பிற்பகல் 3 மணி நிலவரப்படி 78.77 சதவீத வாக்குகள் பதிவாகியுள்ளதாக தகவல்கள் தெரிவிக்கின்றன.
294 தொகுதிகள் கொண்ட மேற்குவங்கத்தில் இரண்டு கட்டங்களாக தேர்தல் நடைபெறுகிறது. முதற்கட்டமாக 16 மாவட்டங்களில் உள்ள 152 தொகுதிகளுக்கு இன்று வாக்குப்பதிவு நடைபெறுகிறது. மீதமுள்ள தொகுதிகளுக்கு ஏப்ரல் 29 அன்று இரண்டாம் கட்டமாக தேர்தல் நடத்தப்பட உள்ளது.
காலை 7 மணிக்கு தொடங்கிய வாக்குப்பதிவு மாலை 6 மணி வரை நடைபெறும். இந்த கட்டத்தில் சுமார் 3.6 கோடி வாக்காளர்கள் வாக்களிக்கத் தகுதியுடையவர்கள் என கூறப்படுகிறது. பாதுகாப்புக்காக சுமார் 2.4 லட்சம் பாதுகாப்புப் படையினர் குவிக்கப்பட்டுள்ளதுடன், பதற்றமான வாக்குச்சாவடிகளில் கூடுதல் பாதுகாப்பும் ஏற்பாடு செய்யப்பட்டுள்ளது.
மம்தா பானர்ஜி தலைமையிலான திரிணமுல் காங்கிரஸ் ஆளும் மாநிலத்தில் நடைபெறும் இந்த தேர்தலில், திரிணமுல் காங்கிரஸ் மற்றும் பாஜ இடையே கடும் போட்டி நிலவுவதாக தெரிவிக்கப்படுகிறது. 2021 தேர்தலில் திரிணமுல் காங்கிரஸ் 215 இடங்களையும், பாஜ 77 இடங்களையும் கைப்பற்றியது.
மேலும், வாக்காளர் பட்டியல் சிறப்பு தீவிர திருத்தப் பணியின் மூலம் 89 லட்சம் போலி வாக்காளர்கள் நீக்கப்பட்ட பின்னணியிலும் இந்த தேர்தல் நடைபெறுகிறது என செய்தி குறிப்பிடுகிறது.
