தூத்துக்குடி மாவட்டத்தில் கடற்கரை பகுதிகளில் ஓட்டுக்காக வழங்கப்பட்டதாக கூறப்படும் பணம் சரியாக பட்டுவாடா ஆகவில்லை என தி.மு.க. நிர்வாகி ஒருவர் சமூக வலைதளத்தில் வெளியிட்ட வீடியோ, கட்சிக்குள் பரபரப்பை ஏற்படுத்தியுள்ளது.
கட்சியினர் கூறுவதன்படி, தூத்துக்குடி மாவட்டத்தில் 80.55% வாக்குப்பதிவு நடந்துள்ளது. கடற்கரை பகுதிகளில் தி.மு.க.க்கு குறைவான வாக்குகள் கிடைத்ததாகவும், அந்த வாக்குகள் த.வெ.க. பக்கம் சென்றதாகவும் சிலர் பேசுகின்றனர்.
திரேஸ்புரம் பகுதியைச் சேர்ந்த ஆரோக்கியதாஸ் வெளியிட்ட வீடியோவில், அமைச்சர் கீதா ஜீவன் ஓட்டுக்காக கொடுத்த பணம் மக்களிடம் முறையாக சென்றடையவில்லை என கூறப்படுகிறது. மேலும், சில வட்டச் செயலர்கள் மற்றும் கவுன்சிலரின் கணவர் சரியாக செயல்படவில்லை என்றும், ஒருவர் வீட்டை பூட்டிவிட்டு வெளியூர் சென்றதால் பணம் வழங்கப்படவில்லை என்றும் அவர் குற்றம்சாட்டுகிறார்.
இதற்கு பதிலளித்த சில தி.மு.க. நிர்வாகிகள், கட்சியின் கணக்கீட்டின் அடிப்படையில் பணம் பட்டுவாடா செய்ய திட்டமிடப்பட்டதாகவும், மாநகர பொறுப்பில் இருந்தவர்களின் தவறான நடவடிக்கையால் நிர்வாகிகளுக்கு பணம் சரியாக சென்றடையவில்லை என்றும் கூறினர். கிடைத்தவர்கள் அதை சரியாக வழங்குகிறார்களா என்பதை கண்காணிக்கவில்லை என்றும் அவர்கள் தெரிவித்தனர்.
ஆனால், வீடியோவில் குறிப்பிடப்பட்ட நிர்வாகிகள், ஆரோக்கியதாஸ் கூறுவது உண்மை அல்ல என்றும், கட்சிக்குள் குழப்பம் உருவாக்கவே அவர் இப்படிப் பேசுவதாகவும் மறுத்துள்ளனர். பணப்பட்டுவாடா குறித்து எதுவும் பேச முடியாது என்றும் அவர்கள் கூறியுள்ளனர்.
