ஈரான் வெளியுறவு அமைச்சர் அப்பாஸ் அராக்சி ரஷ்யா சென்றுள்ளார். ஈரான், அமெரிக்கா மற்றும் இஸ்ரேல் தொடர்பான போரை முடிவுக்குக் கொண்டுவரும் முயற்சிகளின் ஒரு பகுதியாக, அதிபர் விளாதிமிர் புடினுடன் போர் நிறுத்தம் குறித்து ஆலோசிக்க திட்டமிட்டுள்ளதாக தகவல் வெளியாகியுள்ளது.
நிரந்தர போர் நிறுத்தம் உள்ளிட்ட அம்சங்கள் குறித்து நடைபெற வேண்டிய இரண்டாம் கட்ட அமைதி பேச்சு எப்போது நடக்கும் என்பது இன்னும் உறுதியாகவில்லை. தற்போது ஈரான்–அமெரிக்கா இடையே தற்காலிக போர் நிறுத்தம் நடைமுறையில் இருப்பதாகவும், அதை அமெரிக்க அதிபர் டொனால்டு டிரம்ப் காலவரையின்றி நீட்டித்துள்ளதாகவும் செய்தி கூறுகிறது.
பாகிஸ்தானில் நடந்த முதல் கட்ட பேச்சு வெற்றியடையவில்லை. இரண்டாம் கட்டத்துக்கான ஏற்பாடுகள் செய்யப்பட்டாலும், அமெரிக்கா மற்றும் ஈரான் தரப்புகள் மாறிமாறி கடுமையான நிலைப்பாடு எடுத்ததால் அடுத்த கட்டம் எப்போது என்ற தெளிவு இல்லை.
இரண்டாம் கட்ட பேச்சுக்காக அராக்சி சமீபத்தில் பாகிஸ்தான் சென்றார். அங்கிருந்து ஓமன் சென்ற அவர், பின்னர் திடீரென பாகிஸ்தானுக்கு திரும்பி அந்நாட்டு ராணுவ தளபதி அசிம் முனீரை சந்தித்து பேசினார்.
ரஷ்யாவின் செயின்ட் பீட்டர்ஸ்பர்க் நகரில் உள்ள புல்கோவோ விமான நிலையத்தில் அவர் வந்திறங்கியபோது, ரஷ்ய அதிகாரிகள் மற்றும் ரஷ்யாவுக்கான ஈரான் தூதர் காசிம் ஜலாலி வரவேற்றனர். சமூக வலைதளத்தில் வெளியிட்ட வீடியோவில், பாகிஸ்தானில் நடந்த ஆலோசனைகள் “வெற்றிகரமாகவும், ஆக்கப்பூர்வமாகவும்” இருந்ததாகவும், அமைதி பேச்சு எந்த திசையில் மற்றும் எந்த நிபந்தனைகளில் முன்னேற முடியும் என்பதையும் விவாதித்ததாகவும் அவர் தெரிவித்தார்.
