மதுரை சித்திரைத் திருவிழாவின் முக்கிய நிகழ்வான மீனாட்சி–சுந்தரேஸ்வரர் திருக்கல்யாணம் செவ்வாய்க்கிழமை (ஏப்.28) மீனாட்சி அம்மன் கோயிலில் கோலாகலமாக நடைபெற்றது.
இந்த ஆண்டு திருவிழா ஏப்.19 அன்று கொடியேற்றத்துடன் தொடங்கியது. அதன்பின் தினமும் காலை, மாலை அம்மனும் சுவாமியும் பல்வேறு வாகனங்களில் வீதி உலா வந்தனர். திங்களன்று அம்மனுக்கு பட்டாபிஷேகம் நடைபெற்றதுடன், பாரம்பரியமான திக்கு விஜயம் நிகழ்வும் நடந்தது.
இன்று காலை 8:35 முதல் 8:59 மணிக்குள் திருக்கல்யாண மண்டபத்தில் வேத மந்திரங்கள் முழங்க திருமணச் சடங்குகள் நடைபெற்றன. திருமாங்கல்யம் அணிவித்த தருணத்தில் சுமங்கலி பெண்கள் மஞ்சள் கயிறு மாற்றி வழிபட்டனர்.
நிகழ்ச்சியை காண கட்டண அடிப்படையில் 6,000 பேரும், இலவசமாக 6,000 பேரும் அனுமதிக்கப்பட்டனர். மேலும் திருப்பரங்குன்றத்தில் இருந்து பவளகனிவாய் பெருமாளும், முருகப் பெருமானும் வந்திருந்ததாக தெரிவிக்கப்பட்டது.
திருக்கல்யாணத்திற்காக தாலியுடன் இணைக்கப்படும் ‘குழிபொட்டு தாலி’ நேற்று சீர்வரிசையுடன் பல்லக்கில் கோயிலுக்கு கொண்டு வரப்பட்டது. இன்று 1.50 லட்சம் பேருக்கு சேதுபதி பள்ளியில் திருக்கல்யாண விருந்து ஏற்பாடு செய்யப்பட்டுள்ளதாக கூறப்பட்டுள்ளது. ஏப்.29 காலை 6:00 மணிக்கு மாசி வீதிகளில் தேரோட்டம் நடைபெறவுள்ள நிலையில், மே 1 கள்ளழகர் வைகை ஆற்றில் இறங்கும் நிகழ்வுக்காக முதல்முறையாக மாற்றுப்பாதை வழியாக தண்ணீர் விடும் ஏற்பாடுகளை நீர்வளத் துறையினர் செய்துள்ளனர். திருக்கல்யாண நிகழ்ச்சி தினமலர் யூடியூப் உள்ளிட்ட இணைய தளங்களில் நேரலை ஒளிபரப்பாகியது.
