சென்னை உயர் நீதிமன்றத்தின் சமீபத்திய உத்தரவுக்குப் பிறகு, புதுச்சேரியில் வாங்கிய மதுபானங்களை தனிநபர் நுகர்வுக்காக தமிழகத்திற்கு கொண்டு வர முடியுமா என்ற குழப்பம் உருவாகியுள்ளது. இந்த தீர்ப்பை எதிர்த்து மேல் முறையீடு செய்ய இருப்பதாக கடலூர் மாவட்ட காவல் கண்காணிப்பாளர் ஜெயகுமார் தெரிவித்தார்.
புதுச்சேரியில் இருந்து மதுபானம் கொண்டு சென்றதாக பதிவு செய்யப்பட்ட வழக்கை உயர் நீதிமன்றம் ரத்து செய்திருந்தது. தமிழக விதிகளின்படி தனிநபர் ஒருவர் தன் பயன்பாட்டுக்காக 4.5 லிட்டர் வரை இந்தியாவில் தயாரிக்கப்பட்ட வெளிநாட்டு மதுபானத்தை வைத்திருக்க அனுமதி உள்ள நிலையில், அந்த நபரிடம் 1.680 லிட்டர் மட்டுமே இருந்ததால் வழக்கை ரத்து செய்வதாக நீதிமன்றம் குறிப்பிட்டது.
இந்த உத்தரவுக்குப் பிறகு, அனுமதிக்கப்பட்ட அளவில் புதுச்சேரி மதுவை தமிழகத்திற்கு எடுத்துச் செல்லலாம் என்ற தகவல் இரு பகுதிகளிலும் பரவியது. ஆனால் புதுச்சேரி கலால் அதிகாரிகள், புதுச்சேரி கலால் சட்டத்தில் உள்ள அளவுக் கட்டுப்பாடுகள் புதுச்சேரி எல்லைக்குள் மட்டுமே பொருந்தும்; தமிழகத்திற்கு எடுத்துச் செல்லும் போக்குவரத்துக்கு அது தானாகவே பொருந்தாது என்று விளக்கம் அளித்தனர்.
அண்டை மாநிலங்களில் இருந்து தமிழகத்திற்குள் மதுபானம் கொண்டு வருவது, சம்பந்தப்பட்ட கலால் துறையின் அனுமதி இல்லையெனில் சட்டப்படி குற்றமாக கருதி கடத்தல் வழக்காக பதிவு செய்யப்படும் என்றும் அதிகாரிகள் தெரிவித்தனர். தமிழக கலால் போலீசார், தமிழகத்தில் 4.5 லிட்டர் ஐ.எம்.எப்.எல்., 9 லிட்டர் பீர் வரை எடுத்துச் செல்ல அனுமதி இருந்தாலும், அவை டாஸ்மாக் கடையில் வாங்கியதாக ரசீது இருக்க வேண்டும்; வெளிமாநிலம் அல்லது வெளிநாட்டில் இருந்து ஒரு சொட்டு மதுவும் கொண்டு வரக்கூடாது என்று மீண்டும் வலியுறுத்தினர்.
ஜெயகுமார் கூறுகையில், 4.5 லிட்டர் வரை வைத்திருக்கலாம் என்ற விதி புதுச்சேரியில் இருந்து தமிழகத்திற்கு கொண்டு வரப்படும் மதுபானங்களுக்கு பொருந்தாது என்றும், உயர் நீதிமன்ற தீர்ப்பில் தெளிவு பெற மேல் முறையீடு செய்யப்படும் என்றும் தெரிவித்தார்.
