மதுரை மீனாட்சி அம்மன் கோயில் வளாகத்தில் உள்ள பொற்றாமரைக்குளத்தில், 16 வயது சிறுமி சினிமா குத்துப் பாடலுக்கு நடனம் ஆடியதாகக் கூறப்படும் ‘ரீல்ஸ்’ வீடியோ சமூக வலைதளங்களில் வெளியாகி சர்ச்சையை ஏற்படுத்தியுள்ளது.
இந்த கோயிலுக்குள் அலைபேசி கொண்டு செல்ல உயர்நீதிமன்ற மதுரை கிளை உத்தரவின் அடிப்படையில் தடை அமலில் உள்ளது. முன்னதாக சிலர் தரிசனத்தின் போது மற்றும் கோயில் பகுதிகளில் வீடியோ எடுத்து சமூக வலைதளங்களில் பதிவிட்ட சம்பவங்களைத் தொடர்ந்து இந்தத் தடை விதிக்கப்பட்டது. இதையடுத்து, பக்தர்கள் கட்டணம் செலுத்தி அலைபேசியை பாதுகாப்பாக ஒப்படைக்கும் வசதியையும் கோயில் நிர்வாகம் ஏற்படுத்தியது; போலீசார் சோதனை செய்து அலைபேசி இல்லையென உறுதி செய்த பின்பே அனுமதி வழங்கப்படுவதாக கூறப்படுகிறது.
இந்நிலையில் வெளியான ‘ரீல்ஸ்’ வீடியோ, தடை மீறி அலைபேசி கோயிலுக்குள் சென்றதா என்ற கேள்வியை எழுப்பியுள்ளது. ஹிந்து அமைப்புகள் இதற்கு கடும் கண்டனம் தெரிவித்து, சோதனையில் மெத்தனம் இருந்தால் சம்பந்தப்பட்ட போலீசார் மீது ஒழுங்கு நடவடிக்கை எடுக்க வேண்டும் என்றும், அந்த வீடியோவை சமூக வலைதளங்களில் இருந்து அகற்ற வேண்டும் என்றும் வலியுறுத்தியுள்ளன.
போலீஸ் தரப்பில், வீடியோவை வெளியிட்டவர் யார், அதில் நடனமாடிய சிறுமி யார் என்பதுடன், அது எப்போது எடுக்கப்பட்டது மற்றும் அலைபேசியில் பதிவு செய்யப்பட்டதா என்பதையும் விசாரித்து வருவதாக தெரிவிக்கப்பட்டுள்ளது. இந்த விவரங்கள் உறுதியான பிறகே சோதனையில் கவனக்குறைவு இருந்ததா என்பது தெரிய வரும் என ஒரு போலீஸ் அதிகாரி கூறினார்.
