சென்னை: த.வெ.க. அரசு அமைக்குமா என்பது ஓட்டுகள் எண்ணப்படும் நாளில்தான் தெளிவாகும் என்று ம.தி.மு.க. பொதுச்செயலர் வைகோ தெரிவித்தார்.
சென்னையில் செய்தியாளர்களிடம் பேசிய அவர், பெரும்பாலான கருத்துக் கணிப்புகள் தி.மு.க. ஆட்சி அமைக்கும் என்றே தெரிவிப்பதாக கூறினார். அதே நேரத்தில், ஒரு கணிப்பு அ.தி.மு.க.க்கு சாதகமாகவும், மற்றொரு கணிப்பு த.வெ.க.க்கு சாதகமாகவும் இருப்பதாகவும் குறிப்பிட்டார்.
த.வெ.க.க்கு மாணவர்கள் மற்றும் முதன்முறை வாக்காளர்கள் மத்தியில் ஆதரவு அதிகம் இருப்பதாக வைகோ கூறினார். உண்மை நிலை ஓட்டு எண்ணிக்கையில்தான் வெளிப்படும் என்றார்.
மேலும், தமிழகத்தில் த.வெ.க. குறிப்பிடத்தக்க சக்தியாக உருவெடுத்துள்ளதாக அவர் தெரிவித்தார். திராவிட இயக்கம் பலரின் உழைப்பு, தியாகத்தின் பயனாக உருவானது; அதை யாராலும் அழிக்க முடியாது என்றும் கூறினார்.
தி.மு.க. கூட்டணி பெரும்பான்மை பெற்று ஆட்சி அமைக்கும் என்ற நம்பிக்கை இருப்பதாகவும் வைகோ தெரிவித்தார்.
