டில்லி விவேக் விஹார் பகுதியில் உள்ள அடுக்குமாடி குடியிருப்பில் இன்று (மே 3) அதிகாலை ஏற்பட்ட தீ விபத்தில் 9 பேர் உயிரிழந்தனர். சம்பவம் அதிகாலை 3:30 மணியளவில் நடந்ததாக தெரிவிக்கப்பட்டுள்ளது.
குடியிருப்பு கட்டடத்தில் தீப்பற்றி எரிவதாக தகவல் கிடைத்ததும் தீயணைப்பு துறையினர் உடனடியாக சம்பவ இடத்துக்கு சென்று மீட்பு பணிகளை தொடங்கினர். தீயை கட்டுப்படுத்தவும் மக்களை பாதுகாப்பாக வெளியேற்றவும் 12 தீயணைப்பு வாகனங்கள் பயன்படுத்தப்பட்டன.
இரண்டாம், மூன்றாம் மற்றும் நான்காம் தளங்களில் சிக்கியிருந்த 15 பேர் மீட்கப்பட்டதாக அதிகாரிகள் தெரிவித்தனர். இதுவரை இரண்டாம் தளத்தில் இருந்து உடல் கருகிய நிலையில் 9 சடலங்கள் மீட்கப்பட்டுள்ளன; உயிரிழந்தவர்களின் உடல்கள் அடையாளம் காண முடியாத அளவுக்கு கருகியுள்ளதாக கூறப்படுகிறது.
இந்த தீ விபத்துக்கு மின்சார ஷார்ட் சர்க்யூட் காரணமாக இருக்கலாம் என சந்தேகம் எழுந்துள்ள நிலையில், துல்லியமான காரணம் இன்னும் உறுதியாகவில்லை.
இதற்கிடையில், ஹரியானா மாநிலம் குருகிராமின் வஜிர்பூர் பகுதியில் உள்ள ஒரு வீட்டில் பெண் ஒருவர் மற்றும் நான்கு குழந்தைகள் உட்பட 5 சடலங்கள் மீட்கப்பட்டுள்ளன. அருகிலுள்ள சிசிடிவி காட்சிகளை போலீசார் கைப்பற்றி விசாரணை நடத்தி வருகின்றனர்; உயிரிழப்புக்கான காரணம் இதுவரை வெளியிடப்படவில்லை.
