சென்னை: தமிழக சட்டசபை தேர்தலில் கடந்த மாதம் பதிவான வாக்குகளின் எண்ணிக்கை இன்று நடைபெற உள்ள நிலையில், முடிவு எப்படியிருந்தாலும் அதை தங்களுக்கு சாதகமாக சமூக வலைதளங்களில் முன்னிறுத்த அரசியல் கட்சிகளின் ஐ.டி. அணிகள் தயார்நிலையில் உள்ளதாக தெரிவிக்கப்படுகிறது.
தி.மு.க., அ.தி.மு.க., த.வெ.க. உள்ளிட்ட கட்சிகள் தங்களுக்கே வெற்றி என்ற நம்பிக்கையுடன் இருப்பதாக கூறப்படும் நிலையில், அதே நேரத்தில் முடிவை எப்படி “விளக்கி” பரப்புவது என்பதற்கான உள்ளடக்கம் மற்றும் ஒருங்கிணைப்பு திட்டங்களும் தயார் செய்யப்பட்டுள்ளன.
அறிக்கையின்படி, தி.மு.க. வெற்றி பெறாவிட்டால் நடிகர் விஜயை பா.ஜ.வின் ‘பி’ டீம் எனக் காட்டும் வகையில் பிரச்சாரம் செய்ய திட்டமிடப்பட்டுள்ளதாக கூறப்படுகிறது. தி.மு.க. வெற்றி பெற்றால் முதல்வர் ஸ்டாலினை புகழும் 100க்கும் மேற்பட்ட வீடியோக்கள் தயாராக உள்ளதாகவும், சமூக வலைதள பணிகளுக்காக சென்னை கிண்டி, சின்னமலை, தேனாம்பேட்டை ஆகிய இடங்களில் அலுவலகங்கள் அமைக்கப்பட்டுள்ளதாகவும் தெரிவிக்கப்படுகிறது.
அ.தி.மு.க. தரப்பிலும் வெற்றி கிடைத்தால் பொதுச்செயலர் பழனிசாமியை முன்னிறுத்தும் வீடியோக்கள் தயார் நிலையில் இருப்பதாகவும், இதற்கான பணிகள் சென்னை ராயப்பேட்டையில் உள்ள கட்சியின் ஐ.டி. அணி அலுவலகத்தில் நடைபெறுவதாகவும் கூறப்படுகிறது. த.வெ.க. சார்பில் பனையூர் அலுவலகத்திலும், தேனாம்பேட்டையில் உள்ள ஆதவ் அர்ஜுனா அலுவலகத்திலும் கட்டுப்பாட்டு அறைகள் திறக்கப்பட்டு, ஐ.டி. பணிகளுக்காக 120 ஆதரவாளர்கள் பணியில் அமர்த்தப்பட்டுள்ளதாகவும் தெரிவிக்கப்படுகிறது.
மேலும், வெற்றி கிடைக்காவிட்டால் வாக்கு எண்ணிக்கையின்போது ஏற்படும் தகராறுகளை மையப்படுத்தி சோக இசையுடன் கூடிய வீடியோக்களை பதிவேற்றவும், அவற்றை வாட்ஸ்அப் வழியாக பரப்ப பல குழுக்கள் தொடங்கப்பட்டுள்ளதாகவும் கூறப்படுகிறது. நாம் தமிழர் கட்சியில், சீமான் போட்டியிடும் காரைக்குடி தொகுதியை மையமாக வைத்து ஐ.டி. அணி செயல்படுகிறது எனவும், காங்., பா.ஜ., வி.சி.க., பா.ம.க. உள்ளிட்ட கட்சிகளும் இதேபோல் தயாராக உள்ளன எனவும் தெரிவிக்கப்படுகிறது.
