சென்னை: தமிழக சட்டசபைத் தேர்தல் முடிவுகள் வெளியான நிலையில், நடிகர் விஜய் தொடங்கிய தமிழக வெற்றிக் கழகம் (தவெக) புதிதாக களமிறங்கி பெற்ற ஆதரவு எந்தக் கட்சிகளின் ஓட்டுகளிலிருந்து வந்தது என்ற விவாதம் எழுந்துள்ளது.
2021 சட்டசபைத் தேர்தலில் திமுக 37.30% ஓட்டு விகிதம் (1,74,30,179 ஓட்டுகள்) பெற்று 133 இடங்களில் வென்று ஆட்சியைப் பிடித்தது. அதிமுக 33.29% (1,53,91,055) ஓட்டுகளுடன் 66 இடங்களில் வென்று எதிர்க்கட்சியாக இருந்தது. நாம் தமிழர் கட்சி (நாதக) 6.58% (30,42,307) ஓட்டுகள் பெற்றாலும் எந்த இடத்திலும் வெல்லவில்லை.
இந்தத் தேர்தலில் முதன்முறையாக போட்டியிட்ட தவெக 34.92% ஓட்டு விகிதம் (1,72,26,209 ஓட்டுகள்) பெற்று 108 இடங்களை கைப்பற்றியது. திமுக 24.19% (1,19,29,144) ஓட்டுகளையும், அதிமுக 21.21% (1,04,62,146) ஓட்டுகளையும், நாதக 4% (19,72,537) ஓட்டுகளையும் பெற்றதாகத் தெரிவிக்கப்பட்டுள்ளது.
இந்த எண்ணிக்கைகளை 2021-ம் ஆண்டுடன் ஒப்பிட்டால், திமுக ஓட்டு விகிதம் 13.11 சதவீத புள்ளிகளும், அதிமுக 12.08 புள்ளிகளும், நாதக 2.58 புள்ளிகளும் குறைந்துள்ளதாக கணக்கிடப்பட்டுள்ளது. ஓட்டு எண்ணிக்கையில் திமுக 55,01,035 ஓட்டுகள், அதிமுக 49,28,909 ஓட்டுகள், நாதக 10,69,770 ஓட்டுகள் கடந்த தேர்தலை விட குறைந்துள்ளன.
இதன் அடிப்படையில், தவெக எழுச்சி திமுக மற்றும் அதிமுக ஆகிய இரு கட்சிகளின் முந்தைய ஆதரவிலிருந்து குறிப்பிடத்தக்க அளவு ஓட்டுகளை ஈர்த்திருக்கலாம் என தரவுகள் சுட்டிக்காட்டுகின்றன. மேலும், 2021-ல் திமுக பெற்ற மொத்த ஓட்டுகளுடன் ஒப்பிடுகையில், 2026-ல் தவெக பெற்ற ஓட்டுகள் 2,03,970 குறைவாக இருந்தாலும், தவெக ஆட்சியமைக்க உள்ளதாகவும் குறிப்பிடப்பட்டுள்ளது.
