மதுரை: இந்திய அரசியலமைப்பு வரைவு குழுவின் தலைவராக டாக்டர் பி.ஆர். அம்பேத்கர் ஆற்றிய பங்கு உள்ளிட்ட அரசியலமைப்பு சார்ந்த பங்களிப்புகளை மாநில பள்ளி பாடத்திட்டத்தில் இடம்பெறச் செய்ய தமிழக அரசு கொள்கை ரீதியாக நடவடிக்கை எடுக்க வேண்டும் என்று மதுரை உயர்நீதிமன்றக் கிளை உத்தரவிட்டுள்ளது.
இந்த உத்தரவு, 2018-ல் பட்டியல் ஜாதியினர் மற்றும் பழங்குடியினருக்கு எதிரான வன்கொடுமை தடுப்பு சட்டத்தின் கீழ் பதிவு செய்யப்பட்ட வழக்கை ரத்து செய்யக் கோரிய மனுவை விசாரித்தபோது பிறப்பிக்கப்பட்டது. சிவகங்கை மாவட்டத்தில் அம்பேத்கர் பிறந்தநாளை முன்னிட்டு ஒட்டப்பட்ட போஸ்டரை கிழித்ததாகவும், அந்தச் சம்பவத்தின் வீடியோவை வாட்ஸ்ஆப் குழுவில் பரப்பியதாகவும் புகார் அளிக்கப்பட்டிருந்தது. பின்னர் புகார்தாரருடன் சமரசம் ஏற்பட்டதாக மனுதாரர்கள் தெரிவித்தனர்.
நீதிபதி எல். விக்டோரியா கவுரி, மனுதாரர்களுக்கு அம்பேத்கர் குறித்து மேலோட்டமான புரிதல் மட்டுமே இருப்பதாகக் குறிப்பிட்டு, அவரது பிம்பத்தை அவமதிப்பது குடியரசின் அடிப்படை மதிப்புகளான நீதி, சுதந்திரம், சமத்துவம், சகோதரத்துவம் ஆகியவற்றை அலட்சியப்படுத்தும் மனப்பான்மையையும் காட்டும் என்றார். இதன் தொடர்ச்சியாக, மனுதாரர்கள் தலா 101 அம்பேத்கர் வாழ்க்கை வரலாறு மையமான தமிழ் புத்தகங்களை வாங்கி வாசித்து, 100 பிரதிகளை டி.கல்லுப்பட்டி முருகப்பா அரசு மேல்நிலைப் பள்ளி மாணவர்களுக்கு வழங்கவும், சென்னை அடையாறு புற்றுநோய் நிறுவனக் கணக்கில் தலா ரூ.5,000 செலுத்தவும் நீதிமன்றம் முன்பே உத்தரவிட்டிருந்தது.
அந்த உத்தரவுகளை நிறைவேற்றியதை உறுதி செய்த பிறகு, அம்பேத்கரின் வாழ்க்கை வரலாறும் அரசியலமைப்பு பங்களிப்பும் குறித்து மூடிய அறையில் வாய்மொழித் தேர்வு நடத்தப்பட்டதாகவும், மனுதாரர்கள் திருப்திகரமாக பதிலளித்து அறியாமைக்காக வருத்தம் தெரிவித்து மன்னிப்பு கோரியதாகவும் நீதிமன்றம் பதிவு செய்தது. இதையடுத்து வழக்கு ரத்து செய்யப்பட்டது. மேலும், 3 முதல் 10ஆம் வகுப்பு வரை சமூக அறிவியல் மாநில பாடத்திட்டத்தில் அம்பேத்கரின் அரசியலமைப்பு சார்ந்த தொலைநோக்கு பங்களிப்புகளை 2027–28 கல்வியாண்டு முதல் நடைமுறைப்படுத்த அரசு முயற்சிக்க வேண்டும் என்றும், 2027 ஜனவரி 21-ல் அரசு தரப்பில் அறிக்கை தாக்கல் செய்ய வேண்டும் என்றும் நீதிமன்றம் உத்தரவிட்டது.
