புதுடில்லி: தமிழகத்தில் நடிகர்-அரசியல்வாதி விஜய் தலைமையிலான தமிழக வெற்றிக்கழகம் (தவெக) உடன் காங்கிரஸ் கட்சி கூட்டணி வைத்திருப்பதை, காங்கிரஸ் மூத்த தலைவர் மணிசங்கர் அய்யர் கடுமையாக விமர்சித்துள்ளார். இந்த முடிவை அவர் “ஒழுக்கக்கேடு” எனக் குறிப்பிட்டார்.
1925-ஆம் ஆண்டு நவம்பரில் மகாத்மா காந்தி தனது குஜராத்தி இதழான Navjeevan வழியாக, சுயராஜ்யம் என்பது அறநெறி சார்ந்த ஆட்சியாக இருக்க வேண்டும் என்று வலியுறுத்தியதை நினைவூட்டிய அய்யர், கடந்த தேர்தலில் திமுக உடன் இருந்த நிலையில் தற்போது அந்த கூட்டணியிலிருந்து விலகி தவெக உடன் இணைந்ததால் காங்கிரஸ் அந்தக் கோட்பாட்டை மீறியதாக கூறினார்.
இந்த மாற்றத்தை அவர் சந்தர்ப்பவாத அரசியல் என விமர்சித்து, இது அறிவான முடிவா, நல்ல அரசியலா, நல்ல ஒழுக்கமா என்று கேள்வி எழுப்பினார். மேலும், காங்கிரஸ் விலகியதும் திமுக கூட்டணியில் உள்ள மற்ற கட்சிகளும் விலகிவிடும் என நினைத்ததாகவும், ஆனால் யாரும் விலகவில்லை என்றும் அவர் கூறினார்.
இதனால் காங்கிரஸ் நிச்சயமற்ற சூழலில் தனித்து விடப்பட்டுள்ளதாக கூறிய அய்யர், “தொங்கு சட்டசபை” போன்ற நிலை உருவாகி கட்சி “அந்தரத்தில் தொங்கிக் கொண்டிருக்கிறது” என உவமைப்படுத்தினார். இத்தகைய அரசியலால் காங்கிரஸ் முன்னேறும் எனத் தான் நம்பவில்லை என்றும் தெரிவித்தார்.
