சென்னை: 12ம் வகுப்பு பொதுத் தேர்வில் தேர்ச்சி பெறாத மாணவர்கள் மனம் தளர வேண்டாம் என்று திமுக தலைவர் மு.க. ஸ்டாலின் வலியுறுத்தினார்.
வெளியிட்ட அறிக்கையில், இந்த ஆண்டு தேர்வில் வெற்றி பெற்ற அனைத்து மாணவ, மாணவிகளுக்கும் அவர் வாழ்த்து தெரிவித்தார். 95.2% மாணவர்கள் தேர்ச்சி பெற்றுள்ளதாகவும், கடந்த ஆண்டைவிட அதிகமான மாணவர்கள் வெற்றி பெற்றதாக தகவல் கிடைத்ததில் மகிழ்ச்சி அடைந்ததாகவும் கூறினார்.
மாணவர்கள் வாழ்க்கையில் முன்னேற மேற்படிப்புகளில் கூடுதல் கவனம் செலுத்தி படிக்க வேண்டும் என்றும் அவர் கேட்டுக்கொண்டார்.
இந்த முறை தேர்ச்சி பெறத் தவறியவர்கள் தளராமல், தங்களுக்கான அடுத்தடுத்த வாய்ப்புகளைப் பயன்படுத்தி முன்னேற வேண்டும் என்றும், கல்வியே வாழ்க்கை வெற்றிக்கு துணை என்றும் ஸ்டாலின் தெரிவித்தார்.
