நீதிமன்றத்தின் கருத்து
வீடு என்பது வெறும் செங்கல், சாந்தால் ஆன கட்டடம் மட்டுமல்ல; அது ஒரு பெண்ணின் கண்ணியத்தை காக்கும் கடைசி புகலிடம் என மதுரை உயர்நீதிமன்றக் கிளை கருத்து தெரிவித்தது.
வீட்டை இடித்ததாக மனு
மதுரை மாவட்டம் உசிலம்பட்டி அருகே கோவிலங்குளத்தைச் சேர்ந்த மலர் தாக்கல் செய்த மனுவை விசாரிக்கும் போது இந்தக் கருத்து முன்வைக்கப்பட்டது. கணவரை பிரிந்து வாழும் அவர், தன்னுடைய நிலத்தில் உள்ள வீட்டில் வசித்து வந்ததாகவும், பக்கத்து நில உரிமையாளர் ஜேசன் தமிழ்ச்செல்வன், பாஸ்கர பாண்டியன் மற்றும் ‘பில் கேட்ஸ்’ என குறிப்பிடப்பட்ட நபருடன் சேர்ந்து மண் அள்ளும் இயந்திரம் கொண்டு, வீடு அவரது நிலத்தில் இருப்பதாகக் கூறி இடித்ததாகவும் தெரிவித்தார்.
“சிவில் குற்றம் மட்டுமல்ல”
நீதிபதி எல். விக்டோரியா கவுரி, நிலத்தின் மீது உரிமை கோரினாலும் சட்டப்படி நடைமுறைகளை பின்பற்றாமல் குடியிருப்பவரை வெளியேற்றவோ, வீட்டை இடிக்கவோ முடியாது எனக் கூறினார். சட்டத்தின் துணையின்றி செல்வாக்கு படைத்தவர்கள் இவ்வாறு செயல்படுவது சிவில் குற்றம் மட்டுமல்ல; அரசியலமைப்புச் சாசன மதிப்புகளுக்கு ஏற்பட்ட காயம் என்றும் நீதிமன்றம் குறிப்பிட்டது. வீடு இடிக்கப்படும் போது போலீசார் வேடிக்கை பார்த்ததாக கூறப்படுவது அரசியலமைப்பு சட்டத்தின் கடமை தவறுதல் எனவும் சுட்டிக்காட்டப்பட்டது.
நீதிமன்ற உத்தரவுகள்
வீட்டை இடித்ததாக கூறப்பட்ட ஜேசன் தமிழ்ச்செல்வன், பாஸ்கர பாண்டியன் மற்றும் பில் கேட்ஸ் ஆகிய மூவரும் இணைந்து, இடிக்கப்பட்ட அதே இடத்தில் 3 நாட்களுக்குள் வீட்டை மீண்டும் கட்டித் தர வேண்டும் என நீதிமன்றம் உத்தரவிட்டது. மன உளைச்சலுக்காக மூவரும் தலா ரூ.50,000 இழப்பீடு வழங்க வேண்டும் என்றும் கூறப்பட்டது. மறுசீரமைப்புப் பணிகளை மதுரை கலெக்டர் கண்காணித்து, மனுதாரருக்குத் தேவையான பாதுகாப்பை உறுதி செய்ய வேண்டும்; சம்பவம் தொடர்பான விசாரணையை போலீசார் 4 வாரங்களுக்குள் முடித்து அறிக்கை தாக்கல் செய்ய வேண்டும் எனவும் உத்தரவிட்டு, வழக்கை ஜூன் 2க்கு ஒத்திவைத்தது.
