கொல்கட்டா: மேற்கு வங்க சட்டசபை தேர்தலில் பாஜ அமோக வெற்றி பெற்றதைத் தொடர்ந்து, அக்கட்சியின் மூத்த தலைவர் சுவேந்து அதிகாரி (55) நேற்று முதல்வராக பதவியேற்றார். விழாவில் பிரதமர் நரேந்திர மோடி கலந்து கொண்டு, வெற்றிக்கு காரணமான மக்களுக்கு நன்றி தெரிவித்தார்.
294 தொகுதிகளுக்கான தேர்தல் இரண்டு கட்டங்களாக நடைபெற்றது. இதில் 293 தொகுதிகளின் வாக்குகள் மே 4 அன்று எண்ணப்பட்ட நிலையில், முறைகேடு புகாரைத் தொடர்ந்து தெற்கு 24 பர்கானாஸ் மாவட்டத்தின் பால்டா தொகுதியில் மட்டும் மே 21 அன்று மறு ஓட்டுப்பதிவு நடைபெறுகிறது.
293 தொகுதிகளில் பாஜ 207 இடங்களை கைப்பற்றி பெரும்பான்மையுடன் வென்றது. மம்தா பானர்ஜி தலைமையிலான திரிணமுல் காங்கிரஸ் 80 இடங்களில் மட்டுமே வெற்றி பெற்றதாக தெரிவிக்கப்பட்டது. மேலும், மம்தா தனது பவானிபூர் தொகுதியில் தோற்றது கட்சியினரிடையே அதிர்ச்சியை ஏற்படுத்தியதாக கூறப்படுகிறது.
பதவியேற்புக்கு முன், கொல்கட்டாவில் உள்ள பாஜ தலைமையகத்தில் புதிதாக தேர்ந்தெடுக்கப்பட்ட எம்.எல்.ஏ.க்கள் கூட்டம் நடைபெற்றது. இதில் மத்திய உள்துறை அமைச்சர் அமித் ஷா முன்னிலையில் சுவேந்து அதிகாரி பாஜ சட்டசபை குழுத் தலைவராக தேர்ந்தெடுக்கப்பட்டார். பின்னர் அவர் லோக் பவனில் ஆளுநர் ரவியை சந்தித்து ஆட்சி அமைக்க உரிமை கோர, ஆளுநர் அவரை அரசு அமைக்க அழைத்தார்.
வரலாற்றுச் சிறப்புமிக்க பிரிகேட் மைதானத்தில் நடைபெற்ற விழாவில், ஆளுநர் ரவி சுவேந்து அதிகாரிக்கு பதவிப் பிரமாணமும் ரகசியக் காப்பு பிரமாணமும் செய்து வைத்தார். தொடர்ந்து முன்னாள் மாநிலத் தலைவர் திலீப் கோஷ் மற்றும் எம்.எல்.ஏ.க்களான அக்னிமித்ரா பால், அசோக் கிர்தானியா, சுதிராம் துடு, நிசித் பிரமாணிக் ஆகியோர் அமைச்சர்களாக பதவியேற்றனர்; இதனால் ஆறு பேர் கொண்ட அமைச்சரவை அமைந்தது. அமைச்சரவை நாளை விரிவாக்கம் செய்யப்படும் என்றும், இலாகாக்கள் இன்னும் அறிவிக்கப்படவில்லை என்றும் தகவல்கள் தெரிவிக்கின்றன.
