சென்னை
அரசு நிகழ்ச்சிகளில் தமிழ்த்தாய் வாழ்த்து மூன்றாவதாக ஒலிக்கும் நடைமுறை இனி பின்பற்றப்படாது என்று அமைச்சர் ஆதவ் அர்ஜுனா தெரிவித்துள்ளார்.
அவர் வெளியிட்ட அறிக்கையில், தமிழ்த்தாய் வாழ்த்துக்கு நூற்றாண்டு கடந்த வரலாற்றுப் பெருமை இருப்பதாகவும், அதை உலகெங்கும் பரப்பும் நோக்கில் தமிழக அரசு மாநிலப் பாடலாக அறிவித்ததாகவும் குறிப்பிட்டார். தமிழக அரசு நிகழ்ச்சிகளில் தொடக்கத்தில் தமிழ்த்தாய் வாழ்த்தும், நிறைவில் தேசிய கீதமும் இசைக்கப்படுவது வழக்கமான நடைமுறை எனவும் அவர் கூறினார்.
தமிழக வெற்றிக் கழகத்தின் தலைமையில் அமைந்துள்ள புதிய அரசுக்கும் இந்த நீண்டகால நடைமுறையில் மாற்றுக் கருத்து இல்லை என்றும் அவர் தெரிவித்தார்.
ஆனால், பொறுப்பு கவர்னர் ராஜேந்திர அர்லேக்கர் தலைமையில் நடந்த முதல்வர் உள்ளிட்ட அமைச்சர்கள் பதவியேற்பு விழாவில், முதலில் வந்தே மாதரம், பின்னர் தேசிய கீதம், மூன்றாவதாக தமிழ்த்தாய் வாழ்த்து என இசைக்கப்பட்டதாக அவர் சுட்டிக்காட்டினார். இது தமிழக மரபுக்கு ஒவ்வாத புதிய நடைமுறை எனவும் கூறினார்.
இதுகுறித்து கவர்னர் தரப்பில் வலியுறுத்தியபோது, மத்திய அரசின் புதிய சுற்றறிக்கையின்படி செயல்பட வேண்டிய பொறுப்பு இருப்பதாக தெரிவிக்கப்பட்டதாகவும், தவிர்க்க முடியாத சூழலில் தமிழ்த்தாய் வாழ்த்து மூன்றாவதாக ஒலிக்கப்பட்டதாகவும் அறிக்கையில் கூறப்பட்டுள்ளது. இனி வரும் காலங்களில் பழைய நடைமுறையின்படியே—நிகழ்ச்சி தொடக்கத்தில் தமிழ்த்தாய் வாழ்த்தும், இறுதியில் தேசிய கீதமும்—இசைக்கப்படும் என அமைச்சர் தெரிவித்தார்.
