நீட் நுழைவுத் தேர்வை முழுமையாக ரத்து செய்து, பன்னிரெண்டாம் வகுப்பு மதிப்பெண்களை அடிப்படையாகக் கொண்டு மருத்துவ மாணவர் சேர்க்கையை நடத்த அனுமதிக்க வேண்டும் என்று மத்திய அரசை தமிழக முதல்வர் விஜய் வலியுறுத்தியுள்ளார்.
அவர் வெளியிட்ட அறிக்கையில், தேசிய தேர்வு முகமை (NTA) நடத்திய நீட் தேர்வு மே 3 அன்று 5,432 மையங்களில் நடைபெற்றதாகவும், தமிழகத்தில் 31 நகரங்களில் தேர்வு நடந்ததாகவும் குறிப்பிட்டார். நாடு முழுவதும் 22,05,035 பேர் தேர்வில் பங்கேற்றதாகவும், இதில் தமிழகத்திலிருந்து சுமார் 1.4 லட்சம் விண்ணப்பதாரர்கள் இருந்ததாகவும் தெரிவித்தார்.
வினாத்தாள் கசிவு குற்றச்சாட்டுகள் தொடர்பாக சட்ட அமலாக்க அமைப்புகள் மேற்கொண்ட விசாரணைகளின் அடிப்படையில், மத்திய அரசின் ஒப்புதலுடன் சமீபத்தில் நடந்த நீட் தேர்வு ரத்து செய்யப்பட்டதாக அவர் கூறினார். மேலும், இந்த விவகாரம் மத்திய புலனாய்வு அமைப்பான சிபிஐக்கு மாற்றப்பட்டுள்ளதாகவும், இந்த ரத்து நடவடிக்கை நாடு முழுவதும் உள்ள லட்சக்கணக்கான மருத்துவப் படிப்பு ஆர்வலர்களின் நம்பிக்கையை பாதித்துள்ளதாகவும் அவர் தெரிவித்தார்.
நீட் தேர்வின் நம்பகத்தன்மை பாதிக்கப்படுவது இது முதல் முறை அல்ல என்றும், 2024-லும் வினாத்தாள் கசிவு ஏற்பட்டதாகவும் அவர் சுட்டிக்காட்டினார். அப்போது பல இடங்களில் எப்ஐஆர்கள் பதிவு செய்யப்பட்டு பின்னர் சிபிஐக்கு மாற்றப்பட்டதாகவும், உச்ச நீதிமன்றத்தின் அறிவுறுத்தலின் பேரில் முன்னாள் இஸ்ரோ தலைவர் ராதாகிருஷ்ணன் தலைமையில் உயர்மட்ட குழுவை மத்திய அரசு அமைத்ததாகவும் கூறினார்.
அக்குழு 95 சீர்திருத்த பரிந்துரைகளை வழங்கிய நிலையில், இரண்டு ஆண்டுகளுக்குள் மீண்டும் கசிவு குற்றச்சாட்டு எழுந்து தேர்வே ரத்து செய்யப்பட்டிருப்பது தேசிய அளவிலான தேர்வில் உள்ள கட்டமைப்பு குறைபாடுகளுக்கான சான்று என அவர் கூறினார். நீட் அறிமுகமான காலத்திலிருந்தே தமிழக அரசு தொடர்ந்து எதிர்த்து வருவதாகவும், கிராமப்புறம், அரசு பள்ளி, தமிழ் வழி மற்றும் சமூக-பொருளாதார ரீதியாக பின்தங்கிய குடும்பங்களைச் சேர்ந்த மாணவர்கள் பாதிக்கப்படுவதாகவும் தெரிவித்தார். எனவே, நீட்டை முழுமையாக ரத்து செய்து, எம்பிபிஎஸ், பிடிஎஸ், ஆயுஷ் படிப்புகளில் மாநில ஒதுக்கீட்டின் கீழ் உள்ள அனைத்து இடங்களையும் பிளஸ் டூ மதிப்பெண்களின் அடிப்படையில் மாநிலங்களே நிரப்ப அனுமதிக்க வேண்டும் என்று மத்திய அரசை அவர் வலியுறுத்தினார்.
