மதுரை: தமிழகத்தில் இளைஞர்களிடையே உருவாகியுள்ள விஜய் தலைமையிலான த.வெ.க. தாக்கத்தை கட்டுப்படுத்தும் நோக்கில், தி.மு.க. தனது அமைப்பு கட்டமைப்பில் மாற்றம் செய்ய திட்டமிட்டுள்ளது. அதன்படி, இரண்டு சட்டசபை தொகுதிகளுக்கு ஒரு மாவட்ட செயலாளர் (மா.செ.) என்ற அடிப்படையில் நியமனங்கள் செய்யப்படலாம் என கூறப்படுகிறது.
கட்சி அமைப்பு ரீதியாக தற்போது தி.மு.க.வில் 72 மாவட்டங்கள் உள்ளன. சென்னையில் 16 சட்டசபை தொகுதிகளுக்கு 5 மா.செ.க்கள் உள்ளனர்; இதில் இரண்டு மா.செ.க்களுக்கு தலா 5 தொகுதிகள், மீதமுள்ள மூவருக்கு தலா 2 தொகுதிகள் என பொறுப்புகள் பகிரப்பட்டுள்ளன. பல மாவட்டங்களில் ஒரே மா.செ.க்கு 3 அல்லது 4 தொகுதிகள் வரை உள்ள நிலையும் காணப்படுகிறது.
நேற்று நடந்த மா.செ.க்கள் கூட்டத்தில் முதல்வரும் கட்சித் தலைவருமான மு.க. ஸ்டாலின் உருக்கமாக பேசியதாக தகவல் வெளியாகியுள்ளது. சட்டசபை தேர்தலை முன்னிட்டு இளைஞர்களை ஈர்த்த த.வெ.க. அலையை கட்டுப்படுத்த பல நடவடிக்கைகள் எடுக்கப்படும் என அவர் தெரிவித்ததாக கூறப்படுகிறது.
கட்சியின் மூத்த நிர்வாகிகள் கூறுகையில், மா.செ.க்கள் “குறுநில மன்னர்கள்” போல செயல்படும் போக்குக்கு முற்றுப்புள்ளி வைக்க, மா.செ. எண்ணிக்கையை அதிகரித்து ஒவ்வொருவருக்கும் 2 தொகுதிகள் என்ற வரம்பு கொண்டு வர முடிவு செய்யப்பட்டுள்ளதாக தெரிவித்தனர். மேலும் புதிய பதவிகளில் இளைஞர்களை நியமித்து கட்சிக்குள் அவர்களின் ஆதரவை உயர்த்தவும், முதற்கட்டமாக சமூக ஊடகங்களில் தி.மு.க. செயல்பாடுகளை அதிகரிக்கவும் தலைமை திட்டமிட்டுள்ளதாகவும் கூறினர்.
இந்த மாற்றங்களால் தி.மு.க.வில் இளைஞர்களுக்கு பதவி வாய்ப்புகள் அதிகரிக்கும் சூழல் உருவாகியுள்ளதாகவும், விஜய் அரசியலுக்கு வந்ததன் பின்னணியில் இத்தகைய நியமனங்களுக்கு அழுத்தம் அதிகரித்துள்ளதாகவும் கட்சி வட்டாரங்கள் தெரிவித்தன.
