ஓமனின் வடக்கு கடற்கரைப் பகுதியில் இந்திய சரக்கு கப்பல் ஒன்று அடையாளம் தெரியாத வெடிபொருள் தாக்குதலால் தீப்பற்றித் தொடர்ந்து மூழ்கியதாக தகவல் வெளியாகியுள்ளது. இச்சம்பவத்திற்கு மத்திய அரசு கடும் கண்டனம் தெரிவித்துள்ளது.
குஜராத்தைச் சேர்ந்த ‘ஹாஜி அலி’ என்ற சரக்கு கப்பல், ஓமனில் உள்ள லிமா அருகே நேற்று அதிகாலை சென்றுகொண்டிருந்த போது, ட்ரோன் அல்லது ஏவுகணை போன்றதாக சந்தேகிக்கப்படும் வெடிபொருள் தாக்கியதாக கூறப்படுகிறது. தாக்குதலுக்குப் பின் கப்பலில் தீ ஏற்பட்டதுடன், கட்டுப்பாட்டை இழந்த கப்பல் ஓமனை ஒட்டிய கடற்பகுதியில் மூழ்கியது.
அதிகாரிகள் தெரிவிப்பின்படி, கப்பலில் இருந்த ஒரு மாலுமி உட்பட 14 இந்திய பணியாளர்கள் அனைவரும் ஓமன் அதிகாரிகளால் பாதுகாப்பாக மீட்கப்பட்டனர். கப்பல் உரிமையாளர் சுல்தான் அகமது மீட்கப்பட்ட அனைவரும் பாதுகாப்பாக இருப்பதாக தெரிவித்தார்.
தாக்குதல் நடத்தியவர்கள் யார் என்பது உடனடியாக தெரியவில்லை. இருப்பினும், இந்திய வெளியுறவு அமைச்சகம் இந்த தாக்குதலை ஏற்றுக்கொள்ள முடியாது எனக் கூறி, வணிகக் கப்பல்கள் மற்றும் சிவிலியன் மாலுமிகள் தொடர்ந்து குறி வைக்கப்படுவதை கண்டித்துள்ளது. ஹார்முஸ் ஜலசந்தி பகுதியில் ஈரான்–அமெரிக்கா மோதல் தொடர்பான பதற்றங்கள் அதிகரிக்கும் சூழலில், கடல்சார் பாதுகாப்பு கவலைக்குரியதாக மாறியுள்ளதாகவும் குறிப்பிடப்பட்டுள்ளது.
இதனிடையே, இந்தியாவை நோக்கி வந்த இரண்டு எல்.பி.ஜி. டேங்கர் கப்பல்கள் ஹார்முஸ் ஜலசந்தியை வெற்றிகரமாக கடந்ததாக இந்திய அதிகாரிகள் தெரிவித்தனர். மார்ஷல் தீவுகள் கொடி கொண்ட ‘சிமி’ கப்பல் 19,965 டன் எல்.பி.ஜி. உடன் மே 13-ம் தேதி கடந்ததாகவும், அது விரைவில் காண்ட்லா துறைமுகத்தை அடையும் எனவும் கூறப்பட்டது; வியட்நாம் கொடி கொண்ட ‘என்.வி. ஷைன்’ கப்பல் 46,427 டன் எல்.பி.ஜி. உடன் மே 18-ம் தேதி நியூ மங்களூர் வந்தடையும் என தெரிவிக்கப்பட்டது. இரு கப்பல்களிலும் உள்ள சரக்குகள் இந்தியன் ஆயில் கார்ப்பரேஷனுக்கு சொந்தமானவை என அதிகாரிகள் கூறினர்.
