காஞ்சிபுரம் மாவட்டம் பரந்தூரில் முன்மொழியப்பட்ட இரண்டாவது விமான நிலைய திட்டம் குறித்து முதல்வர் விஜய், மே 15 அன்று சென்னை தலைமைச் செயலகத்தில் அதிகாரிகளுடன் முக்கிய ஆலோசனையை நடத்தினார்.
சென்னை மீனம்பாக்கம் விமான நிலையத்தில் பயணியர் மற்றும் சரக்கு போக்குவரத்து தொடர்ந்து அதிகரித்து வரும் நிலையில், விரிவாக்கத்திற்கு இடம் குறைவாக இருப்பதாகக் கூறப்படுகிறது. இதன் பின்னணியில், முந்தைய தி.மு.க. தலைமையிலான அரசு பொது-தனியார் கூட்டு முயற்சியில் பரந்தூரில் புதிய விமான நிலையம் அமைக்க முடிவு செய்திருந்தது. இந்த திட்டத்திற்காக பரந்தூர் மற்றும் சுற்றியுள்ள 20 கிராமங்களில் மொத்தம் 5,320 ஏக்கர் நிலம் தேவைப்படுவதாக தெரிவிக்கப்பட்டுள்ளது.
விவசாய நிலங்கள் பாதிக்கப்படும் என்ற அச்சத்தால் உள்ளூர் விவசாயிகள் தொடர்ந்து எதிர்ப்பு போராட்டங்களில் ஈடுபட்டு வருகின்றனர். த.வெ.க. தலைவர் நிலையில் இருந்த விஜய், 2025 ஜனவரியில் பரந்தூருக்கு சென்று போராட்டக்காரர்களுக்கு ஆதரவு தெரிவித்ததுடன், திட்டத்திற்கும் எதிர்ப்பு தெரிவித்திருந்தார்.
தற்போது த.வெ.க. ஆட்சி அமைத்துள்ள நிலையில், திட்டம் ரத்து செய்யப்படுமா அல்லது தொடருமா என்ற கேள்வி எழுந்துள்ளது. இன்றைய ஆலோசனைக்குப் பிறகு அரசு விரைவில் முடிவை அறிவிக்கும் என்ற எதிர்பார்ப்பு உருவாகியுள்ளது.
இதற்கிடையில், பி.எம்.டபிள்யூ., டி.வி.எஸ்., ஹட்சன் உள்ளிட்ட முன்னணி நிறுவனங்களின் உயர் அதிகாரிகளுடன் முதல்வர் விஜய் முதலீடுகள் தொடர்பாக ஆலோசனை நடத்தினார். மேலும், மேகதாது அணை விவகாரம், ஜூன் 12ல் மேட்டூர் அணையில் நீர் திறப்பது உள்ளிட்டவை குறித்து நீர்வளத்துறை மற்றும் வேளாண்மைத்துறை அதிகாரிகளுடன் கலந்துரையாடி, நீர்நிலைகள் தூர்வாருதல், குறுவை சாகுபடி, பயிர்க்காப்பீடு போன்ற அம்சங்களையும் விவாதித்தார். தலைமைச் செயலகத்தில் நடந்த இந்த ஆலோசனைகள் தினமலர் இணைய தளம் மற்றும் யூடியூப் உள்ளிட்ட தளங்களில் நேரலை ஒளிபரப்பாகின.
