மதுரை: முதல்வர் விஜய் அறிவித்த பெண்களுக்கு ரூ.2,500 உரிமைத்தொகை திட்டத்தை, மாநில பட்ஜெட் தாக்கல் செய்யப்பட்ட பிறகே நடைமுறைப்படுத்த முடியும் என்று சட்டம் மற்றும் மின்சாரத்துறை அமைச்சர் நிர்மல்குமார் வெள்ளிக்கிழமை தெரிவித்தார்.
மதுரை மீனாட்சி அம்மன் கோயிலில் தரிசனம் செய்த பின் செய்தியாளர்களிடம் பேசிய அவர், திட்டத்தை வழங்குவதற்கு முன் நிதி ஆதாரங்களை அரசு சீரமைக்க வேண்டியிருப்பதாக கூறினார்.
குட்கா உள்ளிட்ட போதைப்பொருட்கள், சட்டவிரோத கல் குவாரிகள் மற்றும் மதுக்கடைகள் தொடர்பாக அதிகாரிகள் ஆய்வு செய்து ‘சீல்’ வைப்பதாகவும், இது பழைய மாதிரியான ஆட்சி அல்ல; புதிய ‘வெர்ஷன்’ எனவும் அவர் குறிப்பிட்டார்.
சட்டம்-ஒழுங்கு நிலைமை கட்டுப்பாட்டில் இருப்பதாக கூறிய அமைச்சர், ஒவ்வொரு துறையையும் முதல்வர் தினமும் ஆய்வு செய்து வருவதாகவும், துறைகள் ஒதுக்கீடு உள்ளிட்ட நிர்வாக அம்சங்களை தனிப்பட்ட முறையில் மதிப்பீடு செய்து வருவதாகவும் தெரிவித்தார். பல தசாப்தங்களாக மாறிய நிர்வாகத்தை ஒரே நாளில் திருத்த முடியாது; இன்னும் ஓரிரு மாதங்களில் நிலைமை சீராகும் என்றும் அவர் கூறினார்.
மேலும், அதிகாரிகளுக்கு முழு சுதந்திரம் வழங்கப்பட்டுள்ளதாகவும், அரசு நடவடிக்கைகள் வெளிப்படையாக நடைபெறுவதாகவும் கூறிய அவர், தேவையான நேரத்தில் முதல்வர் செய்தியாளர்களை சந்திப்பார் என்றார்.
