தமிழகத்திற்கு வந்துள்ள இலங்கை நாடாளுமன்ற உறுப்பினர் ராமநாதன் அர்ஜுனா, சென்னை தலைமைச் செயலகத்தில் செய்தியாளர்களிடம் பேசிய போது நாம் தமிழர் கட்சி தலைவர் சீமானை கடுமையாக விமர்சித்தார்.
யாழ்ப்பாணத்திலிருந்து வந்து ராமேஸ்வரத்தில் வசிக்கும் மக்களைச் சந்தித்து, “ஒரு வேளை சாப்பாடு கூட” சீமான் வழங்கியதாக எந்த வரலாறும் இல்லை என அவர் கூறினார். அதே நேரத்தில், அந்த மக்களிடமிருந்து தனது அரசியலுக்காக கோடிக் கணக்கில் பணம் பெற்றதாகவும், பெற்றும் எதுவும் செய்யவில்லை என்பதே தன் முக்கியப் பிரச்னை எனவும் குற்றம்சாட்டினார்.
தமிழக மக்கள் வரலாறு காணாத மாற்றத்திற்காக வாக்களித்துள்ளதாக கூறிய அர்ஜுனா, நடிகர்-அரசியல்வாதி விஜய் முதல்வராக பொறுப்பேற்கும் தருணத்தை பார்க்க ஆசைப்பட்டதாகவும், ஆனால் இலங்கை பாராளுமன்றத்தில் இருந்ததால் அதை காண முடியவில்லை எனவும் தெரிவித்தார்.
மேலும், தங்கள் இனம் அழியும் போது திமுக, அதிமுக அரசுகள் வேடிக்கை பார்த்ததாக விமர்சித்த அவர், ஈழத் தமிழர்களுக்கு ஆதரவாக விஜய் பேச வேண்டும் என்றார். சீமான் ஈழத் தமிழர் பிரச்னையை வாக்கு வாங்குவதற்காகவே பேசினார் என்றும், தன் எதிர்ப்பு தனிப்பட்டது அல்ல; அரசியல் நிலைப்பாடே என்றும் கூறினார்.
சீமான் இதே பாதையில் தொடர்ந்தால், அவரது குடும்பத்திற்கு நன்மை கிடைக்கலாம்; ஆனால் யாழ்ப்பாணத்தில் உள்ள மக்கள் கடுமையாக பாதிக்கப்படுவார்கள் என எச்சரித்தார். சீமான் கூறும் “ஆமைக்கறி” தொடர்பான கதை பொய் என்றும் அவர் தெரிவித்தார்.
