சென்னை: ஐஏஎஸ் அதிகாரியின் பணியிட நியமனத்தை ஜாதி அடிப்படையில் கேள்வி எழுப்பியதாக கூறி, திராவிடர் கழக (தி.க) தலைவர் கி.வீரமணியை ஹிந்து தமிழர் கட்சி கடுமையாக கண்டித்துள்ளது. அவர் தனது பேச்சுக்கு மன்னிப்பு கேட்க வேண்டும் என்றும் கட்சி வலியுறுத்தியுள்ளது.
கட்சித் தலைவர் ராம.ரவிக்குமார் வெளியிட்ட அறிக்கையில், சுற்றுலா, பண்பாடு மற்றும் ஹிந்து சமய அறநிலையத்துறை செயலராக ஐஏஎஸ் அதிகாரி சுவர்ணா நியமிக்கப்பட்டதை குறிப்பிட்டார். அந்த நியமனத்தை “பிராமண அம்மையார்” என ஜாதி குறிப்பிட்டு வீரமணி கேள்வி எழுப்பியதாக அவர் குற்றம்சாட்டினார்.
அரசு விதிமுறைகளின் அடிப்படையிலேயே ஐஏஎஸ் அதிகாரிகள் பல துறைகளில் பணியமர்த்தப்படுவார்கள்; அதே நடைமுறையில்தான் சுவர்ணா நியமிக்கப்பட்டுள்ளார் என ரவிக்குமார் தெரிவித்தார். இவ்வகை விஷயங்களை வீரமணி “பிராமண எதிர்ப்பு” பார்வையில் பார்க்கிறார் என்றும் அவர் விமர்சித்தார்.
மேலும், இதற்கு முன் அறநிலையத்துறையில் பணியமர்த்தப்பட்ட செயலர்களை ஜாதி பெயர் கூறி வீரமணி குறிப்பிடாதது ஏன் என்றும், கடந்த தி.மு.க ஆட்சியில் அரசு தலைமை வழக்கறிஞராக ராமன் நியமிக்கப்பட்டபோது எதிர்ப்பு தெரிவிக்காதது ஏன் என்றும் அவர் கேள்வி எழுப்பினார். அதிகாரிகளின் ஜாதியை வைத்து ஆதரவு அல்லது எதிர்ப்பு தெரிவிப்பது தவறு என கூறி, வீரமணி தனது கருத்தை திரும்பப் பெற்று மன்னிப்பு கேட்க வேண்டும் என்று வலியுறுத்தினார்.
யாரையும் ஜாதி பெயரால் அழைப்பது தவறு என்றும், பொதுவான பார்வையுடன் பொது வெளியில் பேச வேண்டும் என்றும் அந்த அறிக்கையில் தெரிவிக்கப்பட்டுள்ளது.
