திமுக–காங்கிரஸ் இடையிலான உரசல் மேலும் தீவிரமடைந்துள்ளது. முன்னாள் திமுக அமைச்சர் அனிதா ராதாகிருஷ்ணன் பேசியதாக கூறப்படும் கருத்துகளுக்கு எதிராக காங்கிரஸ் எம்பி மாணிக்கம் தாகூர் கடுமையாக கண்டனம் தெரிவித்தார்.
தனது அறிக்கையில், அமைச்சர் பதவியும் அதிகாரமும் இல்லாத நிலையில் “விரக்தி, அகங்காரம்” காரணமாக சிலரின் பேச்சுத் தரம் கீழிறங்குவதாக அவர் விமர்சித்தார். அந்த மொழி காங்கிரஸ் சட்டமன்ற உறுப்பினர்களை மட்டுமல்ல, மூன்றாம் பாலினத்தவர்களையும் இழிவுபடுத்தும் மனநிலையை வெளிப்படுத்துவதாகவும் கூறினார்.
மேலும், திமுகவை அதிகாரத்திற்கு கொண்டு வர காங்கிரஸ் உழைத்ததாக குறிப்பிட்ட தாகூர், தங்களுக்கும் அரசியலில் பதிலடி கொடுக்க தெரியும் என்றார். இருப்பினும் அரசியல் நாகரிகத்தை மதித்து திமுக தலைமையின் பதிலை காத்திருப்பதாக தெரிவித்தார்.
எதிர்க்கட்சித் தலைவர் ராகுல் காந்தி மற்றும் மூத்த தலைவர்களை தொடர்ந்து தரக்குறைவாக பேசும் அரசியல் திமுக தலைமையால் ஊக்குவிக்கப்படுகிறதா என்ற கேள்வியையும் அவர் எழுப்பினார். அனிதா ராதாகிருஷ்ணன் தனது வார்த்தைகளுக்கு மன்னிப்பு கேட்க வேண்டும் என்றும், திமுக தலைமையும் இதை வெளிப்படையாக கண்டிக்க வேண்டும் என்றும் வலியுறுத்தி, இல்லையெனில் அதே அரசியல் மொழியில் பதிலடி கொடுக்க தயங்க மாட்டோம் என எச்சரித்தார்.
கருத்து வேறுபாடு அரசியலில் இயல்பானது என்றாலும், பெண்கள், மூன்றாம் பாலினத்தவர்கள் மற்றும் அரசியல் எதிரிகள் மீது இழிவான வார்த்தைகள் பயன்படுத்துவது அரசியல் கலாச்சாரம் அல்ல; அது அரசியல் நாகரிகத்தின் வீழ்ச்சி என தாகூர் கூறினார்.
