தவெக (தமிழக வெற்றி கழகம்) மற்றும் அக்கட்சியின் பெண் நிர்வாகிகள் குறித்து சர்ச்சைக்குரிய வகையில் அவதூறாக பேசியதாக, திமுக ஆதரவு பேச்சாளராக அறியப்படும் அரசியல் விமர்சகர் பொன்ராஜ் மீது போலீசார் வழக்கு பதிவு செய்துள்ளனர்.
சட்டசபை தேர்தலுக்கு முன்னதாக அவர் கூறியதாக கூறப்படும் கருத்துகள் தவெக பெண் தொண்டர்களை குறிவைத்ததாக புகார் தெரிவிக்கப்பட்டது. இதையடுத்து தவெக தலைவர் விஜய், சென்னை டிஜிபி அலுவலகத்தில் நேரில் சென்று புகார் அளித்து, கடும் நடவடிக்கை எடுக்க வேண்டும் என கோரியிருந்தார்.
சர்ச்சை எழுந்த பின்னர், தனது பேச்சு தவறாக புரிந்து கொள்ளப்பட்டதாக கூறிய பொன்ராஜ் மன்னிப்பும் கேட்டார். இதே நேரத்தில், தவெகவினர் தமக்கு கொலை மிரட்டல் விடுப்பதாக கூறி, சென்னை போலீஸ் கமிஷனரிடம் விஜய் மீது அவர் புகார் அளித்ததாகவும் தெரிவிக்கப்பட்டது.
தவெக நிர்வாகிகள் அளித்த புகாரின் அடிப்படையில், கடலூர் புதுநகர் காவல் நிலையத்தில் பொன்ராஜ் மீது நான்கு பிரிவுகளில் வழக்கு பதிவு செய்யப்பட்டுள்ளது. இதேபோல் சென்னையிலும் அவர் மீது வழக்கு பதிவு செய்யப்பட்டுள்ளதாக தகவல் வெளியாகியுள்ளது.
