சென்னை
தேர்தலுக்குப் பிறகு கூட்டணி மாறுவதை நியாயப்படுத்த முடியாது என்று விடுதலை சிறுத்தைகள் கட்சி தலைவர் தொல். திருமாவளவன் தெரிவித்துள்ளார். நீண்ட காலமாக இணைந்து செயல்பட்ட கூட்டணிக் கட்சிகளின் பங்களிப்பையும் அவர் சுட்டிக்காட்டினார்.
செய்தியாளர்களிடம் பேசிய அவர், கடந்த 7–8 ஆண்டுகளாக கூட்டணியில் இணைந்து பயணித்ததாகவும், கூட்டணிக் கட்சிகளின் வாக்குகளும் உழைப்பும் சேர்ந்தே வெற்றி கிடைத்ததாகவும் கூறினார். மேலும், “ஸ்டாலின் தான் முதல்வர்” என்ற கருத்தை மையமாக வைத்து தான் வாக்குகள் கிடைத்தன என்றும் தெரிவித்தார்.
அதே நேரத்தில், இந்த வாக்கு அதிமுகவுக்கு எதிரானதாக இருந்தாலும், தவெகவுக்கு எதிரான மனநிலையும் இதில் உறுதியாக இருந்ததாக அவர் கூறினார். இப்படியான சூழலில் கூட்டணியை மாற்றுவது குறித்து நெருடல் ஏற்படுவது இயல்பானது என்றும் அவர் குறிப்பிட்டார்.
உடனடியாக முடிவு எடுக்காமல் கால அவகாசம் எடுத்தது கட்சிக்குள் விரிவான ஆலோசனை தேவைப்பட்டதால்தான் என்று விளக்கினார். ஜனாதிபதி ஆட்சி வரும் என கூறி அழுத்தம் கொடுப்பது உள்ளிட்ட அணுகுமுறைகளையும் அவர் விமர்சித்து, சூழ்நிலைகளைப் புரிந்து கொள்ளாமல் உடனடி அறிவிப்பு கேட்பதை ஏற்க முடியாது என்றார்.
