தமிழக முதல்வர் விஜய் இன்னும் சில தினங்களில் டில்லி செல்ல உள்ள நிலையில், தமிழக அரசின் ‘டில்லி சிறப்பு பிரதிநிதி’ பதவிக்கு யார் நியமிக்கப்படுவார் என்ற கேள்வி அரசியல் வட்டாரங்களில் பேசுபொருளாகியுள்ளது. புதிய அரசு பொறுப்பேற்ற பின் ஜனாதிபதி, துணை ஜனாதிபதி, பிரதமர் ஆகியோரை நேரில் சந்திக்கும் மரபின் அடிப்படையில் இந்த டில்லி பயணம் நடைபெறுகிறது என தெரிவிக்கப்படுகிறது.
இந்த பதவி பல நேரங்களில் ஆளுங்கட்சியைச் சேர்ந்த, தேர்தலில் தோற்றவர்கள் அல்லது போட்டியிட வாய்ப்பு கிடைக்காதவர்களுக்கு வழங்கப்படும் நடைமுறை இருப்பதாகவும் கூறப்படுகிறது. தி.மு.க., அ.தி.மு.க. ஆட்சிகளில் இந்த பதவியை மிக முக்கியமாக எடுத்துக் கொள்ளாத போதிலும், மாநில அரசின் கோப்புகள் மத்திய அமைச்சகங்களில் எந்த நிலையில் உள்ளன என்பதை கண்காணிப்பதற்கும், டில்லி–சென்னை தொடர்பு வலையத்தை பராமரிப்பதற்கும் இது முக்கியமான பதவி என குறிப்பிடப்படுகிறது.
சிறப்பு பிரதிநிதி டில்லியில் பெரும்பாலும் தங்கி இருந்து அதிகாரிகள் உதவியுடன் மாநில திட்டங்கள் தொடர்பான முன்னேற்றங்களை தொடர்ந்து கவனிக்க வேண்டும்; தமிழகத்தை பாதிக்கக்கூடிய முடிவுகள் அல்லது திட்டங்கள் இருந்தால் உடனடியாக மாநில அரசுக்கு தெரிவிக்க வேண்டும் என்பதே எதிர்பார்ப்பு. ஆனால் நடைமுறையில், முதல்வர் வருகைக்கு வரவேற்பு ஏற்பாடு செய்வது போன்ற சடங்கு பணிகளுக்கே இந்த பதவி சுருங்கி விடுகிறது என்ற விமர்சனமும் முன்வைக்கப்படுகிறது.
இந்த பதவியில் இருப்பவர்களுக்கு மாதம் ரூ.10,000 தொகுப்பு ஊதியம், டில்லியில் அரசு பங்களா, இலவச உணவு, தனி உதவியாளர், சென்னை தலைமைச் செயலகத்தில் தனி அறை உள்ளிட்ட வசதிகள் வழங்கப்படுவதாக கூறப்படுகிறது. மேலும் மாதம் இருமுறை டில்லி–சென்னை இடையே இலவச விமானப் பயண வசதியும் இருப்பதாக தெரிவிக்கப்படுகிறது. 2006 முதல் தி.மு.க., அ.தி.மு.க. சார்பில் செல்வேந்திரன், தளவாய் சுந்தரம், ஜக்கையன், அசோகன், நரசிம்மன், ஏ.கே.எஸ். விஜயன் உள்ளிட்டோர் இந்த பதவியில் இருந்துள்ளனர்.
புதிய கட்சியான தமிழக வெற்றிக் கழகம் ஆட்சியில் இருப்பதால், இந்த முறை வழக்கமான ‘பார்முலா’வுக்கு மாறாக திறமையான ஒருவரை முழுநேர இணைப்பாளராக நியமிப்பார்களா, அல்லது வழக்கம்போல் ஆறுதல் பரிசாகவே பதவி வழங்கப்படுமா என்ற எதிர்பார்ப்பும் நிலவுகிறது. இதற்கிடையில், முதல்வரை வரவேற்க டில்லியில் உள்ள தமிழ்நாடு இல்லம் தயாராகி வருவதாகவும் தெரிவிக்கப்படுகிறது.
