நாம் தமிழர் கட்சி (நா.த.க.) தலைமை ஒருங்கிணைப்பாளர் சீமான், தமிழக வெற்றிக் கழகம் (TVK) மற்றும் முதல்வர் விஜயை குறிவைத்து, தேர்தல் வாக்குறுதிகள் மற்றும் ஆட்சிச் செயல்பாடுகள் குறித்து கடுமையாக விமர்சித்தார்.
சென்னை அருகே மறைமலை நகரில் நா.த.க. சார்பில் நடைபெற்ற இலங்கை தமிழர் படுகொலை நினைவேந்தல் நிகழ்ச்சியில் உரையாற்றிய அவர், தமிழ் மொழி தமிழர் அடையாளத்தின் மையம் என்றும், சிறிய தேர்தல் வெற்றி–தோல்விகளால் தங்கள் இயக்கம் தளராது என்றும் கூறினார்.
தாங்கள் ஆள் மாற்றம் அல்லது ஆட்சி மாற்றத்திற்காக அல்ல; அடிப்படை அமைப்பையே மாற்ற வருகிறோம் என அவர் தெரிவித்தார். முன்பு தன் பேச்சை “வேடிக்கை” என கூறியவர்கள் இப்போது “வேடிக்கை காட்டியவனை” தலைவனாக்கிவிட்டதாகவும் அவர் விமர்சித்தார்.
வெற்றி பெற்ற பின் மாநிலத்திற்கு 10 லட்சம் கோடி ரூபாய் கடன் இருப்பதாக கூறப்படுவதை சுட்டிக்காட்டி, அது தெரியாமல் முதல்வர் வேட்பாளராக தேர்தலில் நின்றார்களா என கேள்வி எழுப்பினார். நிறைவேற்ற முடியாது என தெரிந்தும் வெற்று வாக்குறுதிகள் அளிக்கப்பட்டதாக குற்றம்சாட்டி, “ஈரானை போரிட்டு கைப்பற்றினால் தான் இலவச காஸ் சிலிண்டர்கள் தர முடியும்” என கிண்டலாக கூறினார்.
மேலும், காங்கிரஸ் கட்சியின் “தரம்” குறித்து தி.மு.க.க்கு இப்போது புரிந்திருக்கும் என கூறிய அவர், வரவிருக்கும் உள்ளாட்சி தேர்தலும் 2029 மக்களவை தேர்தலும் நா.த.க. தனித்து களம் காணும் என தெரிவித்தார்.
