தமிழகத்துடன் தொடர்புடைய ஒரு இடம் உட்பட 25 ராஜ்யசபா இடங்களுக்கான தேர்தல் அறிவிப்பு எந்த நேரத்திலும் வெளியாகலாம் என டில்லி அரசியல் வட்டாரங்கள் தெரிவிக்கின்றன.
பல மாநிலங்களில் உள்ள 24 எம்.பி.க்களின் பதவிக்காலம் ஜூன் 21 முதல் ஜூலை 19 வரை முடிவடைவதால் இந்த தேர்தல் அவசியமாகிறது. தமிழகத்தில், அ.தி.மு.க. சார்பில் ராஜ்யசபா எம்.பி.யாக இருந்த முன்னாள் அமைச்சர் சி.வி.சண்முகம் மயிலம் சட்டமன்றத் தொகுதியில் வெற்றி பெற்றதைத் தொடர்ந்து எம்.பி. பதவியை ராஜினாமா செய்தார்; அந்த இடத்தின் மீதமுள்ள காலம் 2028 வரை இருப்பதால் இடைத்தேர்தல் நடத்த வேண்டியுள்ளது.
ஆந்திராவில் நான்கு ராஜ்யசபா உறுப்பினர்கள் தேர்வு செய்யப்பட உள்ளனர். அங்கு ஆட்சியில் உள்ள தெலுங்கு தேசம், ஜனசேனா, பா.ஜ. ஆகியவை இணைந்த தேசிய ஜனநாயக கூட்டணி, தங்களுக்குள் செய்த ஒப்பந்தத்தின் அடிப்படையில் வேட்பாளர்களை முடிவு செய்ய உள்ளதாக கூறப்படுகிறது.
அந்த ஒப்பந்தத்தில் ஒரு இடத்தில் தமிழக பா.ஜ. முன்னாள் தலைவர் அண்ணாமலையை ஆந்திராவிலிருந்து நிறுத்த பா.ஜ. மேலிடம் பரிசீலித்து வருவதாகவும், இதை கூட்டணி கட்சிகளுக்கு டில்லி மேலிடம் தெரிவித்துள்ளதாகவும் தகவல்கள் வெளியாகியுள்ளன.
தமிழகத்துடன் தொடர்புடைய ராஜ்யசபா இடத்திற்கு ஆளும் த.வெ.க. சார்பில் வேட்பாளர் நிறுத்தப்படுவது உறுதி என கூறப்படுகிறது. ஓய்வுபெற்ற ஐ.பி.எஸ். அதிகாரி ரவி, விஷ்ணு ரெட்டி, அரசியல் வியூக ஆலோசகர் ஜான் ஆரோக்கியசாமி, ஜெகதீஷ், முன்னாள் அமைச்சர் கு.ப.கிருஷ்ணன் மற்றும் ஜோதிடர் ரிக்கி ரத்தன் பண்டிட் உள்ளிட்ட பெயர்கள் பேசப்படுகின்றன; இவர்களைத் தாண்டி புதிய முகம் வருமா என்ற எதிர்பார்ப்பும் டில்லி வட்டாரங்களில் உள்ளது.
