தமிழ்நாடு பள்ளிக்கல்வித் துறை அலுவலகங்களில் பணிபுரியும் பணியாளர்கள், பணியை முடித்து மாலையில் வீட்டுக்குச் செல்லும் முன் மேலதிகாரிகளிடம் தெரிவித்து/அனுமதி பெற்று மட்டுமே புறப்பட வேண்டும் என புதிய அறிவுறுத்தல் வெளியிடப்பட்டுள்ளது.
துறை சார்பு செயலர் ராமச்சந்திரன் அனைத்து அலுவலகப் பிரிவுகளுக்கும் அனுப்பியுள்ள சுற்றறிக்கையில், சில பணியாளர்கள் நேரத்திற்கு அலுவலகத்திற்கு வருவதில்லை என்பது அரசின் கவனத்திற்கு வந்துள்ளதாக குறிப்பிடப்பட்டுள்ளது. இதனால், அனைவரும் காலை 10:00 மணிக்கு முன்பாக அலுவலகத்தில் இருக்க வேண்டும் என வலியுறுத்தப்பட்டுள்ளது.
மேலும், மாலையில் அலுவலகத்தை விட்டு புறப்படும் போது சம்பந்தப்பட்ட இரண்டாம் நிலை அதிகாரிகளிடம் அனுமதி பெற வேண்டும் என்றும் கூறப்பட்டுள்ளது. அலுவலக உதவியாளர்கள் மற்றும் பதிவறை எழுத்தர்கள் காலை 9:30 மணிக்குள் அலுவலகத்திற்கு வர வேண்டும் என தனியாக அறிவுறுத்தப்பட்டுள்ளது.
இந்த வழிமுறைகளை கட்டாயமாக பின்பற்ற வேண்டும்; தவறினால் தகுந்த நடவடிக்கை எடுக்கப்படும் என சுற்றறிக்கையில் எச்சரிக்கை விடுக்கப்பட்டுள்ளது.
அரசு பணியாளர்கள் காலை 10:00 மணிக்குள் அலுவலகப் பணியில் இருக்க வேண்டும் என்ற பொதுவான அறிவுறுத்தல்களின் பின்னணியில் இந்த சுற்றறிக்கை வெளியானதாகவும் குறிப்பிடப்பட்டுள்ளது.
