சமீபத்தில் நடந்த தமிழக சட்டசபைத் தேர்தலில் தி.மு.க. கூட்டணியில் 28 தொகுதிகளில் போட்டியிட்ட காங்கிரஸ், ஐந்து தொகுதிகளில் மட்டுமே வெற்றி பெற்றது. இந்த பின்னடைவு குறித்து ஆய்வு செய்ய கட்சியின் டில்லி மேலிடம் ஐவர் கொண்ட உண்மை கண்டறியும் குழுவை அமைத்துள்ளது.
இதன் ஒரு பகுதியாக, தோல்வியடைந்த 23 தொகுதிகளின் வேட்பாளர்கள் சென்னையில் உள்ள சத்தியமூர்த்தி பவனுக்கு அண்மையில் அழைக்கப்பட்டனர். தமிழக காங்கிரஸ் மேலிட பொறுப்பாளர்கள் கிரீஷ் ஷோடங்கர், நிவேதித் ஆல்வா உள்ளிட்டோர் மற்றும் மாநில நிர்வாகிகள் அவர்களிடம் விளக்கங்கள் கேட்டனர்.
அந்த சந்திப்புகளில் தோல்விக்கான பொறுப்பை குறித்து வேட்பாளர்களும் மாவட்டத் தலைவர்களும் ஒருவர்மீது ஒருவர் குற்றச்சாட்டுகளை முன்வைத்ததாக கூறப்படுகிறது. மேலும், தேர்தல் செலவுக்காக தலைமை வழங்கிய பணத்தை சில வேட்பாளர்கள் செலவிடவில்லை என்பதும் தெரியவந்ததாக தகவல் வெளியாகியுள்ளது.
இதையடுத்து, தோல்விக்கான காரணங்களும் தேர்தல் செலவு தொடர்பான பண முறைகேடு குற்றச்சாட்டுகளும் குறித்து விசாரிக்க ஐவர் குழு அமைக்கப்பட்டுள்ளது. இதில் முன்னாள் எம்.பி. ஜெயகுமார், தமிழக காங்கிரஸ் துணைத் தலைவர்கள் இதயதுல்லா, சொர்ணா சேதுராமன், முன்னாள் அகில இந்திய காங்கிரஸ் செயலர் மெய்யப்பன், கமலாட்சி ஆகியோர் இடம்பெற்றுள்ளனர்.
இந்த குழு விரைவில் விசாரணையைத் தொடங்கி 60 நாட்களுக்குள் அறிக்கை அளிக்க உள்ளது. முறைகேடு உறுதி செய்யப்பட்டால், சம்பந்தப்பட்டவர்களுக்கு மீண்டும் போட்டியிட வாய்ப்பு வழங்கப்படாது; கட்சிப் பதவியும் கிடையாது என டில்லி வட்டாரங்கள் தெரிவிப்பதாக செய்தி கூறுகிறது.
