மேற்காசியப் பிராந்தியத்தில் நிலவும் போர் பதற்றம் காரணமாக எரிபொருள் தட்டுப்பாடு அச்சமும் விலை உயர்வும் அதிகரித்துள்ள சூழலில், எரிபொருள் சேமிப்பு நடவடிக்கையாக பார்லிமென்டில் பணியாற்றும் உயர் அதிகாரிகளுக்கு மின்சார வாகனங்கள் வழங்கும் பணிகள் தீவிரப்படுத்தப்பட்டுள்ளன. இதற்கு லோக்சபா சபாநாயகர் ஓம் பிர்லா உத்தரவிட்டதாக தெரிவிக்கப்பட்டுள்ளது.
நாட்டின் எரிபொருள் தேவையின் பெரும்பங்கு இறக்குமதியால் பூர்த்தி செய்யப்படுவதால், பெட்ரோல், டீசல் மற்றும் வணிக எரிவாயு விலைகள் உயர்ந்துள்ளதாக செய்தி குறிப்பிடுகிறது. இதன் பின்னணியில் எரிபொருள் சிக்கனத்தை கடைபிடிக்குமாறு அரசுத் தரப்பில் வலியுறுத்தப்பட்டு வருகிறது.
அந்த முயற்சியின் ஒரு பகுதியாக, பார்லி உயர் அதிகாரிகள் பயன்படுத்தி வந்த பெட்ரோலில் இயங்கும் அதிகாரப்பூர்வ கார்கள் இனி மின்சார வாகனங்களாக மாற்றப்பட வேண்டும் என சபாநாயகர் உத்தரவிட்டுள்ளார். இதன் காரணமாக பார்லி வளாகத்தில் பச்சை நிற நம்பர் பிளேட் கொண்ட வாகனங்கள் அதிகமாகத் தென்படத் தொடங்கியுள்ளதாகவும் கூறப்படுகிறது.
பதவி மற்றும் அதிகாரப்பூர்வ தேவைகளைப் பொறுத்து ‘மஹிந்திரா XUV400’ அல்லது ‘டாடா நெக்ஸான் EV’ ஆகிய மாடல்களில் ஒன்று வழங்கப்படும். தற்போதைய நிலவரப்படி இணைச் செயலர் மற்றும் அதற்கு மேற்பட்ட நிலைகளில் உள்ள சுமார் 40 அதிகாரிகள் புதிய மின்சார வாகனங்களை பெறுவர் என எதிர்பார்க்கப்படுகிறது.
மேலும், கடந்த சில ஆண்டுகளாகவே பார்லியில் எரிபொருள் சேமிப்பு நடவடிக்கைகள் மேற்கொள்ளப்பட்டு வருவதாகவும், பிரதான கட்டடம் மற்றும் நிலைக்குழு கூட்டங்கள் நடைபெறும் இணைப்பு கட்டடம் இடையிலான குறுகிய பயணங்களுக்கு முன்பு பயன்படுத்தப்பட்ட கார்கள் மாற்றப்பட்டு தற்போது பேட்டரியால் இயங்கும் கோல்ஃப் வண்டிகள் பயன்படுத்தப்படுகின்றன என்றும் செய்தி தெரிவிக்கிறது.
