புளியரை தமிழ்நாடு–கேரள எல்லை சோதனைச்சாவடியில் கனிமவளத்துறை அமைச்சர் பிரபு நள்ளிரவில் திடீரென ஆய்வு மேற்கொண்டதைத் தொடர்ந்து, கனிமவள லாரி போக்குவரத்தும் கல் குவாரிகளும் தீவிர கண்காணிப்புக்குள் வந்துள்ளன.
சோதனைச்சாவடி வழியாக தினமும் ஆயிரக்கணக்கான கனிமவள லாரிகள் கேரளாவுக்கு செல்வதாகவும், இதில் முறைகேடுகள் நடப்பதாக புகார்கள் எழுந்த நிலையில் அமைச்சர் ஆய்வு செய்ததாகவும் தெரிவிக்கப்பட்டுள்ளது. கேரளா செல்லும் லாரிகள் மற்றும் அனுமதி பாஸ்களை அவர் சரிபார்த்து அதிகாரிகளிடம் கேள்விகள் எழுப்பினார்.
இதற்கிடையில், தென்காசி மாவட்டத்தில் செயல்படும் கல் குவாரிகள் குறித்து மாவட்ட ஆட்சியர் கமல் கிஷோருக்கு பல புகார்கள் வந்ததாக கூறப்படுகிறது. அவரது உத்தரவின் பேரில் கனிமவளத்துறையினர் 54 குவாரிகளில் ஆய்வு நடத்தினர்.
அந்த ஆய்வில் 18 குவாரிகளில் முறைகேடு இருப்பது தெரிய வந்ததாகவும், அவற்றை தற்காலிகமாக மூட உத்தரவிடப்பட்டுள்ளதாகவும் அதிகாரிகள் தெரிவித்தனர். விரிவான ஆய்வுக்குப் பிறகு மேல்நடவடிக்கை எடுக்கப்படும் என்றும் கூறப்பட்டுள்ளது.
