தமிழக வெற்றிக் கழக (த.வெ.க.) அமைச்சரவையில் விசிக இடம்பெற்றதைக் குறித்து, கட்சியின் சில நிர்வாகிகள் அதிருப்தியில் இருப்பதாகவும், இதனால் கட்சி தலைவர் தொல். திருமாவளவனுக்கு அழுத்தம் அதிகரித்துள்ளதாகவும் தகவல்கள் வெளியாகியுள்ளன.
சட்டசபை தேர்தலை முன்னிட்டு கட்சி களமிறங்கும் என அறிவித்த பின்னர் அந்த முடிவில் இருந்து பின்வாங்கியதும், மேலும் ஏற்கனவே எம்.எல்.ஏ.க்களாக இருந்த ஆளூர் ஷா நவாஸ், பாலாஜி, பனையூர் பாபு ஆகியோருக்கு வாய்ப்பு மறுக்கப்பட்டதும் அதிருப்திக்கு காரணமாகக் கூறப்படுகிறது. சீட் மறுக்கப்பட்ட மூவரும் கட்சி தலைமையுடன் தொடர்பை குறைத்ததாக தெரிவிக்கப்படுகிறது.
பின்னர் பாலாஜிக்கு கட்சியின் பொருளாளர் பதவியும், ஆளூர் ஷா நவாஸுக்கு முதன்மை செயலர் பதவியும் வழங்கப்பட்டதாக கூறப்படுகிறது. பாலாஜி கட்சி பணிகளை தொடர்ந்தாலும், ஷா நவாஸ் கட்சி நிகழ்ச்சிகளில் பங்கேற்காமல் இருப்பதாகவும், சமூக வலைதளங்களில் கட்சி பொறுப்பை நீக்கியுள்ளதாகவும் தகவல் உள்ளது.
இதற்கிடையில், த.வெ.க. குறித்து முன்பு விமர்சித்த நிலையில் பின்னர் கூட்டணி அமைந்ததை சுட்டிக்காட்டி பனையூர் பாபு கட்சியிலிருந்து விலகியுள்ளார். அவரைத் தொடர்ந்து ஷா நவாஸும் விலகி திமுகவில் இணைவார் எனவும், மேலும் பல நிர்வாகிகள் அடுத்தடுத்து விலகலாம் எனவும் பேசப்படுகிறது.
இந்த சூழலில், அதிருப்தியாளர்களை சமாதானப்படுத்த திருமாவளவன் முயற்சி மேற்கொண்டு வருவதாக விசிக நிர்வாகிகள் சிலர் தெரிவித்ததாக செய்தி கூறுகிறது. த.வெ.க. அமைச்சரவையில் சேர அழைப்பு வந்தபோது திருமாவளவனை அமைச்சராக்க வேண்டும் என சில முன்னணி நிர்வாகிகள் விரும்பிய நிலையில், அவர் வன்னி அரசை பரிந்துரைத்தது பலருக்கு பிடிக்கவில்லை என்றும் அவர்கள் கூறியுள்ளனர். மேலும், ஷா நவாஸுக்காக ராஜ்யசபா எம்.பி. பதவி கேட்டு த.வெ.க. உடன் பேச்சு நடத்தப்படுவதாகவும், உள்ளாட்சி தேர்தலில் இரண்டு மாநகர மேயர் மற்றும் நகராட்சி தலைவர் போன்ற பதவிகளை கேட்டு, அவற்றை அதிருப்தியில் உள்ள நிர்வாகிகளுக்கு வழங்குவதாக உறுதியளித்து சமரசம் செய்ய முயற்சி நடக்கிறது என்றும் தெரிவிக்கப்பட்டுள்ளது.
