கேரள சட்டசபை கூட்டத் தொடக்க நிகழ்ச்சியில் ‘வந்தே மாதரம்’ பாடலின் இசை பகுதியளவு மட்டுமே இசைக்கப்பட்டதற்கு, மாநில கவர்னர் ராஜேந்திர அர்லேக்கர் அதிருப்தி தெரிவித்துள்ளார்.
சமீபத்தில் நடந்த சட்டசபை தேர்தலில் காங்கிரஸ் தலைமையிலான ஐக்கிய ஜனநாயக முன்னணி (யு.டி.எப்) வெற்றி பெற்றதைத் தொடர்ந்து, முதல்வர் வி.டி. சதீசன் தலைமையிலான புதிய அரசு திருவனந்தபுரத்தில் முதல் சட்டசபை கூட்டத்தை தொடங்கியது. கவர்னர் உரைக்கு முன்பாக இசைக்குழுவினர் ‘வந்தே மாதரம்’ பாடலின் இசையை வாசித்தனர்; ஆனால் முதல் இரண்டு பத்திகள் மட்டும் இடம்பெற்றதாக கூறப்படுகிறது.
இந்த நிகழ்ச்சியில் கவர்னர் பங்கேற்கும் போது பாடல் முழுமையாக இடம்பெற வேண்டும் என்றும், இது குறித்து மாநில அரசுக்கு முன்பே தெரிவிக்கப்பட்டிருந்ததாகவும் அர்லேக்கர் கூறினார். பாடல் பாடப்படாமல் இசைக்கப்பட்டதோடு, அதுவும் பகுதியளவு மட்டுமே வாசிக்கப்பட்டது நெறிமுறை மீறல் என அவர் குறிப்பிட்டார்.
இதையடுத்து பா.ஜ.க.வைச் சேர்ந்த மூன்று எம்.எல்.ஏ.க்கள் உள்ளிட்டோர் கண்டனம் தெரிவித்தனர். பா.ஜ.க. செய்தித் தொடர்பாளர் செஷாத் பூனாவாலா, பாடலை சுருக்கி வாசித்தது அரசியலமைப்பு மரபை மீறுவது என்றும், ஆளும் கூட்டணிக்குள் உள்ள அரசியல் அழுத்தமே காரணம் என்றும் குற்றம்சாட்டினார்.
இதற்கு பதிலளித்த முதல்வர் சதீசன், ‘வந்தே மாதரம்’ முழுமையாக பாடப்பட வேண்டும் என்று கட்டாயப்படுத்தும் எந்த பார்லிமென்ட் சட்டமும் இல்லை என்றும், மத்திய அரசு வழிகாட்டுதல்கள் மட்டுமே வெளியிட்டுள்ளதாகவும் தெரிவித்தார். இந்த விவகாரத்தில் யு.டி.எப் கூட்டணி கட்சிகளின் கொள்கை நிலைப்பாட்டுக்கு ஏற்பவே சட்டசபையில் இசை வாசிக்கப்பட்டதாகவும் அவர் கூறினார்.
