சென்னை: தமிழக போக்குவரத்து துறையில் ரூ.20,000 கோடி வரை ஊழல் நடந்துள்ளதாகக் கூறி, தமிழ்நாடு எஸ்.எல்.டி.,–வி.டி.எஸ்., ஸ்டிக்கர் டீலர்கள் நலச்சங்கம் சார்பில் போக்குவரத்து துறை அமைச்சர் தமிழன் பார்த்திபனிடம் மனு அளிக்கப்பட்டுள்ளது.
சங்கத்தின் பொதுச் செயலர் முருகன் கூறுகையில், வாகனங்களில் ஜி.பி.எஸ். கருவி பொருத்துதல், கட்டாய ஸ்டிக்கர் ஒட்டுதல், வேகக் கட்டுப்பாட்டு கருவி பொருத்துதல் போன்ற பணிகளில் கடந்த சில ஆண்டுகளாக முறைகேடுகள் நடைபெற்று வருவதாக தெரிவித்தார்.
கடந்த ஆட்சிக் காலத்தில் மொத்தமாக ரூ.20,000 கோடி அளவுக்கு ஊழல் நடந்ததாகவும், இதில் அதிகாரிகளும் உடந்தையாக இருந்ததாகவும் அவர் குற்றம்சாட்டினார். இதுகுறித்து விசாரணை நடத்தி உரிய நடவடிக்கை எடுக்க வேண்டும் என சங்கம் வலியுறுத்தியுள்ளது.
மேலும், அனைத்து வட்டாரப் போக்குவரத்து அலுவலகங்களிலும் ஸ்டிக்கர் ஒட்டுதல் மற்றும் ஜி.பி.எஸ். பொருத்துதல் பணிகளுக்காக ரூ.3,500 முதல் ரூ.5,000 வரை லஞ்சம் பெறப்படுவதாகவும், இதற்காக ‘சிண்டிகேட்’ அமைத்து பணிகளை கட்டுப்படுத்தி ஊழல் செய்வதாகவும் அவர் கூறினார். மனுவை பெற்ற அமைச்சர் நடவடிக்கை எடுப்பதாக உறுதி அளித்ததாகவும் தெரிவித்தார்.
