அமெரிக்கா, இஸ்ரேல் மற்றும் ஈரான் இடையேயான போர் நீடிப்பதால், உலகின் முக்கிய எண்ணெய் போக்குவரத்து பாதைகளில் ஒன்றான ஹார்முஸ் ஜலசந்தி பகுதியில் அபாயம் அதிகரித்துள்ளது. மூன்று நாடுகளும் அமைதி ஒப்பந்தத்திற்கு தயாராக உள்ளதாக செய்திகள் வந்தாலும், அது எப்போது கையெழுத்தாகும் என்பது தெளிவாக இல்லை.
ஈரான் அருகே உள்ள இந்தப் பகுதியில் ஏற்பட்ட பாதிப்பால் ஹார்முஸ் வழியாக பெட்ரோலிய பொருட்கள் நகர்வில் தடங்கல் ஏற்பட்டதாக கூறப்படுகிறது. இதன் விளைவாக பல நாடுகளில் பெட்ரோல், டீசல் விலை உயர்ந்துள்ள நிலையில், இந்தியாவிலும் சமீப வாரங்களில் பெட்ரோல், டீசல் மற்றும் சமையல் எரிவாயு விலைகள் பலமுறை உயர்ந்துள்ளன.
மத்திய அரசு ‘பெட்ரோலிய பொருட்களுக்கு தட்டுப்பாடு இல்லை’ என்று கூறி வந்தாலும், வளைகுடா நாடுகளிலிருந்து இந்தியாவுக்கு கச்சா எண்ணெய் வருவதில் உருவான சிக்கல் கவலைக்குரியதாக உள்ளது. ஹார்முஸ் வழியாக வரும் கப்பல்களை தாக்குவோம் என ஈரான் எச்சரித்ததாகவும், தாக்குதல்கள் நடந்ததாகவும் தகவல்கள் வெளியாகியுள்ளன; இதற்கிடையே அமெரிக்க போர்க்கப்பல்களும் அந்தப் பகுதியில் முகாமிட்டுள்ளன.
இந்த வழித்தடம் மூலம் இந்தியாவுக்கு பெருமளவில் கச்சா எண்ணெய் மற்றும் சமையல் எரிவாயு கப்பல்கள் வருகின்றன. தற்போது 10-க்கும் மேற்பட்ட இந்திய கப்பல்கள் கச்சா எண்ணெய், எரிவாயு ஏற்றி அந்தப் பகுதியில் காத்திருப்பதாகவும், சில கப்பல்கள் இந்தியாவை அடைந்துவிட்டதாகவும், மற்றவை பயணத்தில் இருப்பதாகவும் தெரிவிக்கப்படுகிறது.
பாதுகாப்பு ஏற்பாடுகள் குறித்து அதிகாரிகள் வெளிப்படையாக கூற மறுத்து, அது ‘ரகசியம்’ என தெரிவித்துள்ளனர். இருப்பினும், வெளியுறவு அமைச்சர் எஸ். ஜெய்சங்கர் ஈரான் அரசுடன் தொடர்ந்து பேச்சுவார்த்தை நடத்தி வருவதாகவும், மத்திய கப்பல் துறை அமைச்சகம் ‘வார் ரூம்’ ஒன்றை அமைத்து இந்திய கடற்படையுடன் ஒருங்கிணைந்து 24 மணி நேரமும் கப்பல் நகர்வுகளை கண்காணித்து, தாக்குதலை தவிர்க்க வேண்டிய பாதைகள் குறித்து கப்பல் கேப்டன்களுக்கு ஆலோசனை வழங்கி வருவதாகவும் கூறப்படுகிறது.
