பிரசித்தி பெற்ற கோவில்களில் நடைமுறையில் உள்ள “சிறப்பு தரிசனம்” குறித்து மீண்டும் விவாதம் தீவிரமடைந்துள்ளது. திருச்செந்தூர் சுப்பிரமணிய சுவாமி கோவிலில் அறநிலையத்துறை அமைச்சர் ரமேஷ் நடத்திய ஆய்வில், கட்டண வசூல் தொடர்பான முறைகேடுகள் மற்றும் சாதாரண பக்தர்கள் சந்திக்கும் சிரமங்கள் வெளிச்சத்திற்கு வந்ததாக கூறப்படுகிறது.
பக்தர்கள் பலர், கட்டணம் செலுத்துபவர்களுக்கு முன்னுரிமை வழங்கப்படுவதால் மற்றவர்கள் மணிக்கணக்கில் காத்திருக்க வேண்டிய நிலை உருவாகிறது என குற்றம்சாட்டினர். மேலும் வி.ஐ.பி., அதிகாரிகளின் தொடர்புடையவர்கள், செல்வாக்குள்ளவர்கள் ஆகியோருக்கு முன்னுரிமை அளிக்கப்படுவதாகவும், இதனால் ஏழை மற்றும் நடுத்தர மக்களுக்கு சமமான தரிசனம் மறுக்கப்படுவதாகவும் சிலர் தெரிவித்தனர்.
இதற்குத் தீர்வாக, சிறப்பு தரிசனத்தை முழுமையாக ரத்து செய்து அனைவருக்கும் ஒரே வரிசை முறையை அமல்படுத்த வேண்டும் என்ற கோரிக்கை முன்வைக்கப்பட்டது. அதே நேரத்தில் நீண்ட நேரம் காத்திருக்கும் பகுதிகளில் கழிப்பிடம், குடிநீர், பிரசாதம் போன்ற அடிப்படை வசதிகளை முறையாக ஏற்படுத்த அரசு கவனம் செலுத்த வேண்டும் என்றும் வலியுறுத்தப்பட்டது.
மற்றொரு தரப்பு, பாரம்பரிய வழிபாட்டு நடைமுறைகளில் அரசு தலையிடக் கூடாது என்றாலும், வி.ஐ.பி. தரிசனத்திற்கு குறிப்பிட்ட நேரத்தை மட்டும் ஒதுக்கி முன்கூட்டியே அறிவித்தால் பொதுமக்கள் தேவையற்ற காத்திருப்பை தவிர்க்கலாம் என பரிந்துரைத்தது. கைக்குழந்தைகள், முதியவர்கள், மாற்றுத்திறனாளிகளுக்கு தனி வழி ஏற்படுத்த வேண்டும் என்றும், காத்திருப்பு அரங்குகளில் மின்விசிறி உள்ளிட்ட வசதிகள் இருக்க வேண்டும் என்றும் கூறினர்.
மேலும் சிலர், கோவில் சொத்துகள் ஆக்கிரமிப்பு மற்றும் காணிக்கை/கட்டணத் தொகைகள் கோவிலின் பணிகளுக்கும் பக்தர்களின் நலனுக்கும் முழுமையாக பயன்படுத்தப்படவில்லை என்ற கவலையையும் பதிவு செய்தனர். கோவில் வருவாய் மீண்டும் கோவில் பராமரிப்பு மற்றும் வசதிகளுக்கே செல்லும் வகையில் வலுவான நடைமுறைகள் தேவை என அவர்கள் வலியுறுத்தினர்.
