கோல்கத்தாவில் அர்ஜென்டினா கால்பந்து நட்சத்திரம் லியோனல் மெஸ்ஸியின் 70 அடி உயர பிரமாண்ட சிலை, பாதுகாப்பு காரணங்களை முன்வைத்து அகற்றப்பட்டுள்ளது.
லேக் டவுன் பகுதியில் அமைந்திருந்த அந்த சிலை, கடந்த மே 25ம் தேதி வீசிய பலத்த காற்றில் ஆடியதாக கூறப்படுகிறது. இதையடுத்து உள்ளூர்வாசிகள் போலீஸில் புகார் அளித்தனர்.
புகாரின் அடிப்படையில் இன்ஜினியர்கள் ஆய்வு மேற்கொண்டதில், சிலையின் கட்டமைப்பு உறுதித்தன்மை போதவில்லை; அது பாதுகாப்பற்றதாக இருப்பது தெரிய வந்தது. தற்காலிகமாக கயிறுகளால் கட்டி பாதுகாக்கப்பட்டதாகவும் தெரிவிக்கப்பட்டது.
இந்த நிலையில், மேற்கு வங்க அரசு இன்று சிலையை அகற்றி வேறு இடத்திற்கு கொண்டு செல்லும் பணியை மேற்கொண்டது. இராட்சத கிரேன் உதவியுடன் சிலை பாதுகாப்பாக அப்புறப்படுத்தப்பட்டது.
கடந்த ஆண்டு டிசம்பர் மாதம் கோல்கத்தா வந்திருந்த மெஸ்ஸி, இந்த சிலையை திறந்து வைத்ததாக செய்தியில் குறிப்பிடப்பட்டுள்ளது.
