புதுடில்லி: பாஜவில் இருந்து அண்ணாமலை விலகினார். அவர் தனது ராஜினாமா கடிதத்தை கட்சியின் தேசிய தலைவர் நிதின் நபினிடம் ஒப்படைத்தார்.
கட்சியில் தனக்கு பதவி வழங்கப்படவில்லை என்ற அதிருப்தி காரணமாக அவர் தனிக்கட்சி தொடங்கலாம் என்ற தகவல்கள் வெளியான நிலையில், டில்லி மேலிடம் அவரை பேச்சுவார்த்தைக்காக அழைத்ததாக கூறப்படுகிறது. இதையடுத்து அவர் சென்னையிலிருந்து விமானத்தில் டில்லி சென்றார்; அங்கு தனியார் நட்சத்திர ஹோட்டலில் தங்கியிருந்தார்.
ஜூன் 2 அன்று நிதின் நபினை சந்தித்து பேசிய பின்னர், பாஜவில் இருந்து விலகுவதற்கான ராஜினாமா கடிதத்தை அவர் வழங்கினார்.
கரூர் மாவட்டம் சின்னதாராபுரம் அருகே தொட்டம்பட்டியில் 1984 ஜூன் 4 அன்று பிறந்த அண்ணாமலை, 2011ல் ஐபிஎஸ் அதிகாரியாகத் தேர்ச்சி பெற்று கர்நாடகத்தில் பல மாவட்டங்களில் எஸ்பியாக பணியாற்றினார். 2020ல் பாஜவில் இணைந்த அவர், 2021ல் தமிழக பாஜ தலைவர் பதவிக்கு நியமிக்கப்பட்டார்.
2021 சட்டசபை தேர்தலில் அரவக்குறிச்சி தொகுதியிலும், 2024 லோக்சபா தேர்தலில் கோவை தொகுதியிலும் போட்டியிட்டு தோல்வியடைந்தார். 2025 ஏப்ரலில் மாநிலத் தலைவர் பதவியிலிருந்து விலகினாலும், தமிழகம், புதுச்சேரி, கேரளா சட்டசபை தேர்தல்களில் பாஜ கூட்டணி வேட்பாளர்களுக்கு ஆதரவாக பிரசாரம் மேற்கொண்டதாக செய்தியில் குறிப்பிடப்பட்டுள்ளது.
