மத்திய இடைநிலை கல்வி வாரியம் (சிபிஎஸ்இ) பயன்படுத்தும் பாடப்புத்தகங்கள் மற்றும் பயிற்சிகளை வழங்கும் என்.சி.இ.ஆர்.டி., பிளஸ் 2 அரசியல் அறிவியல் பாடப்புத்தகத்தில் சமகால உலக அரசியல் தொடர்பான பகுதிகளில் சில மாற்றங்கள் மற்றும் சேர்க்கைகளை செய்துள்ளதாக தெரிவிக்கப்பட்டுள்ளது.
சமகால உலக அரசியல் போக்கு என்ற பாடத்தில், “ஆசாத் பாகிஸ்தான்” என்ற சொல்லை, பாகிஸ்தான் ஆக்கிரமிப்பு ஜம்மு–காஷ்மீர் எனவும், அது பாகிஸ்தானின் சட்டவிரோத ஆக்கிரமிப்பின் கீழ் உள்ள இந்திய பகுதி எனவும் குறிப்பிடும் வகையில் மாற்றியுள்ளதாக கூறப்படுகிறது.
மேலும், பெரும்பாலான மாநிலங்களுக்கு சமமான அதிகாரங்கள் இருந்தாலும், ஜம்மு–காஷ்மீர் மற்றும் வடகிழக்கு மாநிலங்கள் போன்ற சில மாநிலங்களுக்கு சிறப்பு விதிகள் இருந்ததாகவும், ஜம்மு–காஷ்மீருக்கான சிறப்பு விதிகளுடன் இருந்த 370வது சட்டப்பிரிவு 2019 ஆகஸ்டில் ஜனாதிபதியால் ரத்து செய்யப்பட்டதாகவும் புத்தகத்தில் குறிப்பிடப்பட்டுள்ளதாக தகவல் வெளியாகியுள்ளது. 370வது பிரிவு நீக்கம் குறித்த விளக்கமும் சேர்க்கப்பட்டுள்ளதாக கூறப்படுகிறது.
இந்தியா–சீனா உறவுகள் பற்றிய பாடத்தில், எல்லை தொடர்பான பேச்சுவார்த்தைகளில் இந்திய எல்லையில் சீனாவின் ஆக்கிரமிப்பால் நம்பிக்கை சிதைந்ததாக குறிப்பிடப்பட்டுள்ளதாக தெரிவிக்கப்பட்டுள்ளது. அதே நேரத்தில், குஜராத் கலவரம், அவசர நிலை கால சர்ச்சைகள், காந்தி படுகொலை போன்ற தலைப்புகள் நீக்கப்பட்டதாகவும், பாபர் மசூதி மூன்று குவிமாட கட்டடம் என்றும், அயோத்தி பிரச்னை சுமுகமாக தீர்க்கப்பட்டதாகவும் பாடத்தில் விளக்கப்பட்டுள்ளதாகவும் செய்தி கூறுகிறது.
