சென்னை: பொதுப்பணி மற்றும் நெடுஞ்சாலைத்துறை அமைச்சர் ஆதவ், இனி டெண்டர்கள் வெளிப்படைத்தன்மையுடன் வெளியிடப்படும் என்றும், ஒப்பந்ததாரர்களிடம் லஞ்சம் கேட்கும் அதிகாரிகள் மீது நடவடிக்கை எடுக்கப்படும் என்றும் தெரிவித்தார்.
சென்னை சேப்பாக்கத்தில் பொதுப்பணித்துறை ஒப்பந்ததாரர்களுடனும், கிண்டியில் நெடுஞ்சாலைத்துறை ஒப்பந்ததாரர்களுடனும் அவர் தனித்தனியாக ஆலோசனை நடத்தினார். இதில் ஒப்பந்ததாரர்கள் எதிர்கொள்ளும் பிரச்னைகள் குறித்து விரிவாக கேட்டறிந்தார்; ஜிஎஸ்டி மற்றும் வரி பிடித்தம் தொடர்பான சிக்கல்களையும் அவர்கள் எடுத்துரைத்தனர்.
தகுதியுள்ள யாரும் பங்கேற்கும் வகையில் ஒப்பந்ததாரர் தேர்வு இனி திறந்த முறையில் நடைபெறும் என அமைச்சர் கூறினார். அரசியல்வாதிகள் அல்லது அதிகாரிகளுக்கு 10 சதவீத கமிஷன் வழங்க வேண்டிய அவசியம் இனி இல்லை என்றும், அந்தச் சேமிப்பை கட்டட பராமரிப்பு பணிகளுக்கு பயன்படுத்த வேண்டும் என்றும் அவர் வலியுறுத்தினார்.
கட்டுமானம் மற்றும் பராமரிப்பு தேவைகளை அடிப்படையாகக் கொண்டு டெண்டர்கள் வழங்கப்படும் என்றும், புகார்கள் தெரிவிக்க கட்டணமில்லா தொலைபேசி எண் விரைவில் வெளியிடப்படும் என்றும் அமைச்சர் அறிவித்தார்.
தேசிய நெடுஞ்சாலைகள் மேம்பாட்டுக்காக தமிழக அரசு வலியுறுத்தியுள்ளதாகவும், அதை ஏற்று தமிழகத்தில் சாலைப் பணிகளுக்கு ரூ.2 லட்சம் கோடி வரை செலவிட முடியும் என மத்திய சாலை போக்குவரத்து துறை அமைச்சர் நிதின் கட்கரி தெரிவித்ததாகவும் ஆதவ் கூறினார்.
இந்தக் கூட்டங்களில் பொதுப்பணித்துறை செயலர் சுன்சோங்கம் ஜடக் சிரு, நெடுஞ்சாலைத்துறை செயலர் செல்வராஜ், முதன்மை இயக்குனர் செல்வதுரை உள்ளிட்டோர் பங்கேற்றனர். இதற்கிடையில், ‘ரேடியோ டிவிஷன்’ ஒப்பந்ததாரர்கள் கூட்டத்திற்கு அழைக்கப்படவில்லை என்றும், பங்கேற்க அனுமதி கேட்டும் அதிகாரிகள் அனுமதிக்கவில்லை என்றும் புகார் தெரிவித்தனர்.
