சென்னையில் செய்தியாளர்களிடம் பேசிய சவுக்கு சங்கர், தமிழ்நாடு மின்வாரிய அலுவலகத்தில் ஹார்டு டிஸ்க்கள் திருடுபோனதாக கூறப்படும் சம்பவம் முன்னாள் அமைச்சர் செந்தில் பாலாஜியை காப்பாற்றும் நோக்கில் நடந்ததாக குற்றம்சாட்டினார். 18 ஹார்டு டிஸ்க்கள் காணாமல் போன விவகாரத்தில் பொதுமக்களுக்கு தெரியாமல் பல நிகழ்வுகள் நடைபெறுவதாகவும் அவர் கூறினார்.
டிரான்ஸ்பார்மர் கொள்முதல் தொடர்பான வழக்கில் சிபிஐ விசாரணை நடத்த சென்னை உயர்நீதிமன்றம் உத்தரவிட்டுள்ள நிலையில், அந்த விசாரணைக்கு தேவையான ஆதாரங்களை பாதுகாத்து வழங்க வேண்டிய பொறுப்பு அரசுக்கு இருப்பதாக அவர் வலியுறுத்தினார். மே 20-ம் தேதி ஹார்டு டிஸ்க்கள் காணாமல் போனதாக கூறப்படும் நிலையில், ஜூன் 1-ம் தேதி தான் புகார் அளிக்கப்பட்டது ஏன் எனவும் அவர் கேள்வி எழுப்பினார்.
இந்த வழக்கை குற்றப்பிரிவு போலீசார் விசாரிக்க வேண்டும் என்றாலும், சிந்தாதிரிப்பேட்டை காவல் நிலையத்தில் புகார் அளிக்கப்பட்டுள்ளதாக கூறி, விவகாரம் தீவிரமாக கையாளப்படுகிறதா என்ற சந்தேகம் எழுவதாக தெரிவித்தார். மேலும், மின்வாரியத்தில் மின்சாரத் திருட்டை கண்டறியும் விஜிலன்ஸ் பிரிவின் தலைமை அலுவலகத்தில் இருந்த ஹார்டு டிஸ்க் கூட காணவில்லை எனவும் அவர் கூறினார்.
முன்னர் நடந்த சில ஊழல் விவகாரங்களில் ஆதாரங்கள் மறைக்கப்பட்டதாக அவர் கூறியதை சுட்டிக்காட்டி, டிஜிட்டல் தரவுகள் உள்ள சேமிப்பு சாதனங்கள் முக்கிய ஆதாரங்களாக மாறக்கூடும் என்றார். ஹார்டு டிஸ்க்கள் பெங்களூருவில் மீட்கப்பட்டதாக செய்திகள் வெளியானாலும், அதில் உள்ள தரவுகளே முக்கியம் என அவர் வலியுறுத்தினார்.
இந்த ஹார்டு டிஸ்க் திருட்டு விவகாரத்தையும் சிபிஐ தான் விசாரிக்க வேண்டும் என்று சவுக்கு சங்கர் கோரிக்கை வைத்தார். கடந்த ஐந்து ஆண்டுகளில் மின்வாரியத்தில் நடந்ததாக கூறப்படும் முறைகேடுகள் தொடர்பான தகவல்கள் அதில் இருக்கக்கூடும் என்றும், நீதிமன்ற உத்தரவின் பேரிலான விசாரணைக்கு தேவையான ஆதாரங்களை அரசு பாதுகாக்க வேண்டும் என்றும் அவர் தெரிவித்தார்.
