தமிழ்நாடு மின் வாரியத்தில் டிரான்ஸ்பார்மர் கொள்முதல் தொடர்பான ரூ.397 கோடி முறைகேடு புகாரில் சிபிஐ வழக்குப்பதிவு செய்துள்ள நிலையில், சென்னை அண்ணா சாலையில் உள்ள மின்வாரிய தலைமையகத்தில் டெண்டர் சார்ந்த டிஜிட்டல் ஆவணங்கள் உள்ள 20க்கும் மேற்பட்ட ஹார்டு டிஸ்க்குகள் காணாமல் போனதாக தெரிவிக்கப்பட்டுள்ளது.
2021 முதல் 2023 வரை மின்வாரியத்திற்கு 45,800 டிரான்ஸ்பார்மர்கள் கொள்முதல் செய்யப்பட்டதாகவும், சந்தை விலையை விட 50% வரை அதிகமாக விலை நிர்ணயித்து வாங்கியதால் மின்வாரியத்திற்கு இழப்பு ஏற்பட்டதாகவும் புகார் கூறப்படுகிறது. 500 கிலோவோல்ட்-ஆம்பியர் திறன் கொண்ட 800 டிரான்ஸ்பார்மர்களுக்கான டெண்டரில் ஒரு யூனிட்டுக்கு ரூ.13.72 லட்சம் என விலை குறிப்பிடப்பட்டு, பேச்சுவார்த்தைக்கு பின் ரூ.12.49 லட்சமாக குறைக்கப்பட்டதாக மின்வாரியம் கூறிய நிலையில், மத்திய அரசின் மின்னணு சந்தை தளத்தில் ரூ.8.91 லட்சம் என விலை குறிப்பிடப்பட்டிருந்ததாகவும் தெரிவிக்கப்பட்டுள்ளது.
இந்த விவகாரம் தொடர்பாக அறப்போர் இயக்க நிர்வாகிகள் மற்றும் அ.தி.மு.க. சார்பில் சென்னை உயர் நீதிமன்றத்தில் வழக்கு தொடரப்பட்டு, சிபிஐ விசாரணைக்கு உத்தரவிடப்பட்டது. அந்த உத்தரவை எதிர்த்த மேல்முறையீடுகளை உச்ச நீதிமன்றம் தள்ளுபடி செய்ததைத் தொடர்ந்து, முன்னாள் அமைச்சர் செந்தில்பாலாஜி உள்ளிட்டோர் மீது சிபிஐ வழக்குப்பதிவு செய்துள்ளது.
இதற்கிடையில், மே 20 அன்று பொறியாளர் மலர்விழி ஹார்டு டிஸ்க்குகள் காணாமல் போனதை கண்டறிந்து மேலதிகாரிகளுக்கு தகவல் அளித்ததாக கூறப்படுகிறது. மின்வாரியத்தின் உள்ளக விசாரணையில், மே 16–17 வார இறுதி நாட்களில் பணியாளர்கள் குறைவாக இருந்த நேரத்தில் திருட்டு நடந்திருக்கலாம் என தெரிய வந்ததாகவும், ஜூன் 1 அன்று சிந்தாதிரிப்பேட்டை காவல் நிலையத்தில் புகார் அளிக்கப்பட்டதாகவும் தெரிவிக்கப்பட்டுள்ளது.
போலீசார் பல தளங்களில் உள்ள கண்காணிப்பு கேமரா பதிவுகளை ஆய்வு செய்தபோது, பல கேமராக்கள் பழுதடைந்திருந்ததாக கூறப்படுகிறது. கணினி பராமரிப்பு பணியாளர்களை விசாரித்ததில், ‘ஆர்ம்டேக் கம்யூட்டர்ஸ்’ நிறுவனத்தைச் சேர்ந்த கோபிநாத் (31) என்பவர் கைது செய்யப்பட்டார்; ஹார்டு டிஸ்க்குகளை திருடி பெங்களூரில் பணத்திற்கு விற்றதாக அவர் கூறியதாக போலீசார் தெரிவித்தனர். இதே நேரத்தில், இந்த விவகாரத்தை “பூதாகரமாக்கும் முயற்சி எடுபடாது” என செந்தில்பாலாஜி திடீர் விளக்கம் அளித்துள்ளார்.
