த.வெ.க. கட்சியில் புதிய சர்ச்சை வெடித்துள்ளது. ஓமலூர் தொகுதியில் போட்டியிட்டு தோற்ற வேட்பாளர் அதியமான் பேசும் வீடியோ சமூக வலைதளங்களில் பரவிய நிலையில், சேலம் மேற்கு தொகுதியில் கட்சியின் எம்எல்ஏ ஓட்டுக்கு ரூ.2,000 வழங்கியதாக அவர் குற்றம்சாட்டியுள்ளார்.
சேலம் மாவட்டம் ஓமலூர் தொகுதியில் அதியமான் 97,707 வாக்குகள் பெற்றும், அ.தி.மு.க. வேட்பாளர் மணியிடம் 14,539 வாக்குகள் வித்தியாசத்தில் தோல்வியடைந்தார். தோல்விக்கான காரணங்களை ஆராய ஓமலூரில் நடந்த த.வெ.க. ஆலோசனை கூட்டத்தில் அவர் பேசியதாக கூறப்படுகிறது.
வீடியோவில், சேலம் மேற்கு தொகுதியில் நடந்ததாக கூறப்படும் பண விநியோகம் காரணமாக கடைசி இரண்டு நாட்களில் ஓமலூர் தொகுதியில் எதிர்விளைவு ஏற்பட்டதாக அதியமான் தெரிவிக்கிறார். இதனால் தன்னிடம் குறைந்தபட்சம் 5,000 முதல் 6,000 வாக்குகள் வரை குறைந்திருக்கலாம் என்றும் அவர் கூறுகிறார்.
திருச்சியில் முதல்வர் விஜய், “ஓட்டுக்கு பணம் கொடுக்கும் கலாசாரத்தை உடைத்துள்ளோம்” என்று பேசிய பின்னணியில், அதே கட்சியின் வேட்பாளர் ஒருவரே எம்எல்ஏ மீது பகிரங்கமாக குற்றச்சாட்டு வைத்தது கட்சியினரிடையே அதிர்ச்சியை ஏற்படுத்தியதாக தகவல் வெளியாகியுள்ளது. இதேபோல், போக்குவரத்துத்துறை அமைச்சர் விஜய் தமிழன் பார்த்திபன் பெயரை சொல்லி கட்சி நிர்வாகிக்கு மிரட்டல் விடுத்ததாக கூறப்படும் ஒரு ஆடியோவும் சமீபத்தில் பரவியதாக குறிப்பிடப்பட்டுள்ளது.
இந்த வீடியோவும் ஆடியோவும் பரவலாக பகிரப்பட்டதால், கட்சிக்குள் உள்ள கருத்து வேறுபாடுகள் சமூக வலைதளங்களில் வேகமாக வெளிப்படுகின்றன என்ற விவாதமும் எழுந்துள்ளது.
