சென்னை: தமிழகத்தில் முதல் முறையாக ஆட்சி அமைத்துள்ள தமிழக வெற்றிக் கழகம் (த.வெ.க.) பார்லிமென்டின் இரு சபைகளிலும் எம்.பி.க்கள் இல்லாத நிலையில், இப்போதைக்கு ராஜ்யசபாவில் நுழைந்து மத்திய அரசுடன் நேரடியாக மோத வேண்டாம் என முதல்வர் விஜய் முடிவு செய்ததாக தகவல் வெளியாகியுள்ளது.
அ.தி.மு.க. முன்னாள் அமைச்சர் சண்முகம் தனது ராஜ்யசபா எம்.பி. பதவியை ராஜினாமா செய்ததையடுத்து, காலியான அந்த இடத்துக்கு ஜூன் 18-ஆம் தேதி தேர்தல் நடைபெற உள்ளது. டில்லியில் அரசியல் செய்யவும், மத்திய பா.ஜ.க. அரசை எதிர்கொள்ளவும் அனுபவம் உள்ள ஒருவரை த.வெ.க. சார்பில் அனுப்பும் என எதிர்பார்ப்பு இருந்தது.
ஆனால் எதிர்பாராத வகையில், தங்களுக்கு கிடைக்க இருந்த ஒரே ராஜ்யசபா இடத்தை காங்கிரசுக்கு விட்டுக் கொடுத்துள்ளதாக த.வெ.க. தரப்பில் கூறப்படுகிறது. சட்டசபை தேர்தல் காலத்தில் த.வெ.க. உடன் கூட்டணி வேண்டும் என வெளிப்படையாக வலியுறுத்திய காங்கிரஸ் தரவு பகுப்பாய்வு பிரிவு தேசிய தலைவர் பிரவீன் சக்கரவர்த்திக்காக இந்த இடம் வழங்கப்படுவதாகவும் கட்சியினர் தெரிவிக்கின்றனர்.
மேலும், முதல்வரான பின் கடந்த மே 27-ஆம் தேதி டில்லி சென்ற விஜய் பிரதமர் மோடி, மத்திய நிதியமைச்சர் நிர்மலா சீதாராமன் ஆகியோரை சந்தித்ததாகவும், அந்த சந்திப்பு வெற்றிகரமாக அமையவில்லை என கூறப்படுவதாகவும் தகவல் குறிப்பிடுகிறது. மத்திய உள்துறை அமைச்சர் அமித் ஷாவை சந்திக்கும் முயற்சியும் நிறைவேறவில்லை என கூறப்படுகிறது. இந்நிலையில் ராஜ்யசபாவில் த.வெ.க. நுழைந்தால் பா.ஜ.க.-வை நேரடியாக எதிர்க்க வேண்டிய சூழல் உருவாகும் என்பதால், மத்திய அரசுடன் இணக்கமான போக்கை 2028 ஜூனில் நடைபெற உள்ள தமிழகத்தின் ஆறு ராஜ்யசபா இடங்களுக்கான தேர்தல் வரை தொடர விஜய் முடிவு செய்திருப்பதாக தகவல் வெளியாகியுள்ளது.
