தமிழ்நாட்டின் வட மாவட்டங்களில் வன்னியர் சமூக ஓட்டுகளை குறிவைத்து, தமிழக வெற்றிக் கழகம் (த.வெ.க.) புதிய வியூக நடவடிக்கைகளை தொடங்கியுள்ளதாக கட்சி நிர்வாகிகள் தெரிவித்தனர்.
சட்டசபை தேர்தலில் சென்னை மற்றும் புறநகரில் த.வெ.க. அதிக தொகுதிகளை பெற்றாலும், வட மாவட்டங்களில் குறைவான தொகுதிகளே கிடைத்ததாக அவர்கள் கூறினர். வன்னியர் மக்கள் அடர்த்தியாக உள்ள அரியலூர், விழுப்புரம், மயிலாடுதுறை மாவட்டங்களில் ஒரு தொகுதியிலும் வெற்றி பெற முடியவில்லை என்றும் தெரிவித்தனர்.
மேலும் கடலூர், தர்மபுரி, கள்ளக்குறிச்சி, கிருஷ்ணகிரி, திருப்பத்தூர், திருவண்ணாமலை உள்ளிட்ட மாவட்டங்களில் தலா ஒரு தொகுதி மட்டுமே கிடைத்ததாகவும், அதே பகுதிகளில் பா.ம.க.–அ.தி.மு.க. கூட்டணி 32 தொகுதிகளில் வென்றதாகவும் கூறினர். அம்பேத்கரை கொள்கைத் தலைவராக முன்னிறுத்தி பட்டியலின மக்களின் ஓட்டுகளை அதிகமாக குறிவைத்ததே வட மாவட்டங்களில் வளர்ச்சிக்கு தடையாக இருந்ததாகவும் அவர்கள் விளக்கினர்.
தேர்தலுக்குப் பிறகு த.வெ.க. உடன் வி.சி.க. இணைந்துள்ளதால், வரும் காலத்திலும் வட மாவட்டங்களில் வன்னியர் ஓட்டுகள் த.வெ.க. பக்கம் வருவதில் சிக்கல் ஏற்படலாம் எனக் கூறி, இதை கருத்தில் கொண்டு ‘ஆப்பரேஷன் நார்த்’ என்ற திட்டம் தொடங்கப்பட்டுள்ளதாக தெரிவித்தனர். இதன் ஒரு பகுதியாக கடலூர், விழுப்புரம் மாவட்டங்களுக்கு பொறுப்பு அமைச்சராக கட்சியின் பொதுச்செயலாளர் ஆனந்த் நியமிக்கப்பட்டு, அவர் வழியாக வன்னியர் சமூக பிரமுகர்களை கட்சிக்குள் கொண்டு வர திட்டமிடப்பட்டுள்ளதாக கூறினர்.
வட மாவட்டங்களில் பலமாக உள்ள பா.ம.க. ஆதிக்கம் நீர்த்துப்போக வேண்டும் என்பதே த.வெ.க. வளர்ச்சிக்கான முக்கிய இலக்கு என்றும், அதற்கான பணிகள் தொடங்கியுள்ளதாகவும் அவர்கள் தெரிவித்தனர். வேலூர், ராணிப்பேட்டை, திருப்பத்தூர், திருவண்ணாமலை உள்ளிட்ட மாவட்டங்களில் பா.ம.க. முக்கிய நிர்வாகிகளை அணுகும் முயற்சிகள் நடப்பதாகவும், பா.ம.க. தலைவர் அன்புமணியை விமர்சிக்காமல் கட்சியை ‘கரைக்கும்’ அணுகுமுறை பின்பற்றப்படுவதாகவும் கூறினர். கரூர், டில்லி பயணங்கள் முடிந்த பின் தர்மபுரி, கடலூர் உள்ளிட்ட மாவட்டங்களுக்கு விஜய் நேரில் சென்று புதிய திட்டங்களை அறிவிக்க உள்ளதாகவும், இதன் மூலம் 2029 லோக்சபா தேர்தலில் வட மாவட்டங்களை கைப்பற்ற முடியும் எனவும் அவர்கள் தெரிவித்தனர்.
