முல்லைப் பெரியாறு அணை அருகே புதிய அணை கட்டுவது மட்டுமே தீர்வு என கேரள நீர்வளத்துறை அமைச்சர் மோன்ஸ் ஜோசப் தெரிவித்ததற்கு தமிழக விவசாயிகள் கடும் எதிர்ப்பு தெரிவித்துள்ளனர். பெரியாறு நீரை நம்பி வாழும் விவசாயிகளிடையே இந்த கருத்து மீண்டும் பதற்றத்தை ஏற்படுத்தியுள்ளது.
2014 மே 7-ம் தேதி உச்சநீதிமன்றம் வழங்கிய தீர்ப்பில், முல்லைப் பெரியாறு நீர்மட்டத்தை 142 அடியாக நிலைநிறுத்தலாம் என்றும், பேபி அணையை பலப்படுத்திய பின் முழுக் கொள்ளளவான 152 அடியாக உயர்த்தலாம் என்றும் கூறப்பட்டது. அதற்கு முன் 136 அடியாக குறைக்கப்பட்டிருந்த நீர்மட்டம், தீர்ப்புக்குப் பிறகு அதே ஆண்டில் 142 அடியாக உயர்த்தி நடைமுறைப்படுத்தப்பட்டது.
ஆனால் கடந்த 10 ஆண்டுகளாக கேரளாவில் ஆட்சியில் இருந்த இடதுசாரி கூட்டணி, பேபி அணை பலப்படுத்தும் பணிகளுக்கு பல்வேறு தடைகள் ஏற்படுத்தி 152 அடியாக உயர்த்தும் நடவடிக்கையை தாமதப்படுத்தியதாக விவசாயிகள் குற்றம்சாட்டினர். அணை உடைவு போன்ற காட்சிகள் மற்றும் குறும்படங்கள் மூலம் அச்சத்தை உருவாக்கி பிரச்னை பெரிதாக்கப்பட்டதாகவும் அவர்கள் கூறினர்.
கேரளாவில் தற்போது காங்கிரஸ் கூட்டணி வெற்றி பெற்று சதீசன் முதல்வராக உள்ள நிலையில், தீர்வு கிடைக்கும் என்ற எதிர்பார்ப்பு இருந்ததாக விவசாயிகள் தெரிவித்தனர். ஆனால் மோன்ஸ் ஜோசப், “கேரள மக்களை பாதுகாக்க புதிய அணை தேவை” என கூறி, உச்சநீதிமன்றத்தில் மீண்டும் முறையிட உள்ளதாக அறிவித்தது எதிர்ப்பை அதிகரித்துள்ளது.
பல நிபுணர் குழு ஆய்வுகளுக்குப் பிறகே 2014 தீர்ப்பு வந்ததாகவும், தமிழக நீர்வளத்துறை தொடர்ந்து பராமரிப்பு பணிகளை செய்து வருவதாகவும் விவசாயிகள் வலியுறுத்தினர். மத்திய கண்காணிப்பு குழு மற்றும் துணை கண்காணிப்பு குழு ஆய்வுகளிலும் அணை வலுவாக இருப்பதாக தெரிவிக்கப்பட்டுள்ளதாக கூறிய அவர்கள், 2011-ல் நடந்தது போன்ற பெரிய போராட்டம் உருவாகும் முன் தமிழக முதல்வர் விஜய் தக்க பதிலடி அளிக்க வேண்டும் என கோரினர்.
