விருதுநகர்: தொழில்துறை அமைச்சர் கீர்த்தனா குறித்து, அவர் தென்கொரியா சென்ற பயணம் மற்றும் ராயல் என்பீல்டு நிறுவனத்தின் முதலீடு ஆந்திராவிற்கு சென்றதாக கூறப்படும் விஷயங்களை முன்வைத்து “தவறான பிம்பம்” உருவாக்க முயற்சி நடக்கிறது என காங்கிரஸ் எம்.பி. மாணிக்கம் தாகூர் குற்றம்சாட்டினார்.
விருதுநகர் ரயில்வே நிலையத்தில் அம்ரித் பாரத் திட்டப் பணிகளை ஆய்வு செய்த பின்னர் செய்தியாளர்களிடம் பேசிய அவர், திட்டப் பணிகள் தாமதமாகுவதற்கு விரிவாக்கம் மற்றும் திட்டமிடலில் உள்ள சிக்கல்களே முக்கிய காரணம் என்றார். அனைத்து பணிகளும் 2027 ஜனவரிக்குள் முடியும் என்றும் தெரிவித்தார்.
வந்தே பாரத் ரயிலுக்கு விருதுநகரில் நிறுத்தம் வழங்கினால் முன்பதிவுகள் அதிகரிக்கும் என கூறிய தாகூர், முன்பதிவு இல்லாத டிக்கெட்களை வென்டிங் மெஷின்கள் மற்றும் ‘ரயில் ஒன்’ செயலி மூலம் பெற வேண்டும் என்ற அறிவுறுத்தல்களை ரயில்வே துறையை தனியார்மயமாக்கும் நடவடிக்கையாக விமர்சித்தார்.
அரசியல் நிலவரம் குறித்து, ‘இந்தியா’ கூட்டணியில் காங்கிரஸ் தலைமையேற்றுள்ளதால் மதிப்பளிக்கும் கட்சிகளுக்கு தாங்களும் மதிப்பளிப்போம் என்றார். மேலும், புதிய அரசு அமைந்து 30 நாட்கள் ஆன நிலையில் துறை மேம்பாட்டுக்காக அமைச்சர் கீர்த்தனா முயற்சிகள் மேற்கொண்டு வருகிறார் என்றும் கூறினார்.
மேலும் தி.மு.க. அமைப்பு செயலாளர் ஆர்.எஸ். பாரதி குறித்து விமர்சனம் முன்வைத்த அவர், பரந்தூர் விமான நிலைய விவகாரத்தில் தற்போதைய அரசு கொள்கை முடிவு எடுக்கும் என்றார். மின்வாரிய ஊழல் மற்றும் அலுவலகத்தில் நடந்த திருட்டு சம்பவத்தில் தொடர்புடையவர்கள் மீது தமிழக அரசு கடுமையான நடவடிக்கை எடுக்கும் என்றும் தெரிவித்தார்.
