திருப்பதி, சபரிமலை போன்ற இடங்களில் உள்ள நடைமுறையைப் போல, தமிழக கோயில்களிலும் தரிசனத்திற்கு முன்பதிவு முறையை கொண்டு வர தமிழக அரசு விருப்பம் காட்டுகிறது. இதுகுறித்து கோவை மக்களிடம் கேட்டபோது, இந்த மாற்றம் தேவையா என்ற விவகாரத்தில் கருத்துகள் இருவேறு திசைகளில் சென்றன.
சிலர், மனக்கஷ்டம் வந்தால் திடீரென கோயிலுக்கு சென்று தரிசனம் செய்வதே பலரின் வழக்கம் என்பதால், “முன்பதிவு செய்தால்தான் தரிசனம்” என்ற கட்டாயம் சிரமம் தரும் எனக் கூறினர். நீண்ட நேரம் காத்திருப்பதை குறைக்கும் வசதிகளை மேம்படுத்தி, பணம் கொடுத்தால் தனி தரிசனம் என்ற நிலையை மாற்றி ஒரே வரிசை முறையை கொண்டு வர வேண்டும் என்றும் வலியுறுத்தினர்.
மற்றொரு தரப்பு, ஆன்லைன் முன்பதிவு வந்தால் கூட்ட நெரிசலை ஒழுங்குபடுத்த முடியும் என்றும், விரைவு தரிசனம் என்ற பெயரில் பணம் வசூலிப்பது போன்ற முறைகேடுகள் குறையும் என்றும் தெரிவித்தனர். குறிப்பிட்ட நாள், குறிப்பிட்ட நேரம் என்ற முறையால் பக்தர்கள் திட்டமிட்டு வர முடியும்; தேவையற்ற அழுத்தமும் குறையும் என அவர்கள் கூறினர்.
அதே நேரத்தில், முன்பதிவு வசதி விரும்புபவர்களுக்கு வழங்கப்பட்டாலும், நேரடியாக வரும் பக்தர்களுக்கும் தரிசன வாய்ப்பு உறுதியாக இருக்க வேண்டும் என்ற கருத்தும் முன்வைக்கப்பட்டது. மேலும், அனைத்து கோயில்களிலும் கட்டாயப்படுத்தாமல், பெரிய கோயில்களில் முக்கிய நாட்கள் போன்ற நேரங்களில் மட்டும் நடைமுறைப்படுத்தினால் சாதாரண பக்தர்கள் பாதிக்கப்பட மாட்டார்கள் என சிலர் பரிந்துரைத்தனர்.
